ASNN – Shqipëria e ka humbur ndeshjen e 3-të të grupit G të Eliminatoreve të Botërorit “Rusi 2018”, pasi dy gola të shënuar në pjesën e dytë, i kanë mjaftuar Spanjës që të marrë fitoren e dytë në 3 ndeshjet e deritanishme dhe të marrë kreun e renditjes, së bashku me Italinë.
Diego Kosta dhe Nolito kanë qenë ata që e kanë mposhtur portierin Berisha, duke bërë që Shqipëria tanimë të ndajë vendin e 3-të dhe të 4-t të renditjes së bashku me Izraelin. Pritej të ishte një ndeshje mjaft e vështirë dhe, përtej përpjekjeve titanike të kuqezinjve, Spanja ka fituar në Shkodër.
Ndeshja e 3-të e grupit G të Eliminatoreve të Botërorit “Rusi 2018” për Kombëtaren kuqezi ka qenë ajo ndaj kampiones së botës dhe të Evropës, Spanjës, e cila ka fituar me dy gola në pjesën e dytë dhe tanimë ka rigjetur kreun e renditjes, të cilin e ndan me Italinë, me nga 7 pikë secila.
Megjithëse ka bërë një pjesë të parë heroike, duke e ndalur valën e sulmeve të njëpasnjëshme dhe mjaft të rrezikshme të iberikëve, herë falë mbrojtjes e herë falë portierit Berisha, Kombëtarja kuqezi është dorëzuar në pjesën e dytë, duke pësuar dy herë.
Një gabim nga ana e portierit kuqezi u ka dhënë mundësi spanjollëve të përfitojnë dhe të gjejnë golin e parë në minutën e 55-të, me anë të Diego Kostës. Goli i ka goditur kuqezinjtë, ndërsa iberikët vazhdojnë të sulmojnë dhe, në minutën e 63-të, është i sapofuturi në fushë Nolito, ai që depërton në zonë dhe gjen sërish rrugën e rrjetës.
2-0 për Spanjën dhe Shqipëria nuk ka më fuqi të reagojë. Përfundimisht Spanja fiton me këto shifra dhe Shqipëria tanimë të ndajë vendin e 3-të dhe të 4-t të renditjes së bashku me Izraelin.
