ASNN – Munden 0-3 në “Elbasan Arena” përballë Anglisë, takimi erdhi drejtpërdrejt në RTSH Sport. Shpresat e Shqipërisë e kanë mbyllur me një humbje sfidën e tyre të radhës në Eliminatoret e Kampionatit Evropian të Nën-21-vjeçarëve, teksa janë mundur 0-3 përballë bashkëmoshatarëve të Anglisë. Takimi i luajtur në Stadiumin “Elbasan Arena” dhe i sjellë për sportdashësit në mbrëmje drejtpërdrejt në RTSH Sport, ka qenë i 8-ti për skuadrën kuqezi, të drejtuar nga trajneri Alban Bushi në kuadër të grupit G të këtyre Eliminatoreve.
Trajneri i kuqezinjve, Alban Bushi e nisi ndeshjen me këtë formacion: Simoni, Ndrecka, Kalaj, Selmani, Mitaj, Marku, Çelhaka, Ismajlgeci, Cara, Dobra dhe Tuci. Në minutën e 14-të, Bushi detyrohet të bëjë një zëvendësim të detyruar pasi Tuci ka probleme fizike dhe detyrohet të lërë fushën e lojës, duke i lënë vendin Eljon Toçit. Përtej mbizotërimit të lojës nga ana e skuadrës angleze, Shpresat arrijnë ta mbyllin pjesën e parë me rrjeta të paprekura. Ndërkaq, ajo e dyta ka nisur praktikisht me gol, pasi Balogun i ka kaluar miqtë në epërsi në minutën e 47-të.
Vetëm 4 minuta më pas, Xhouns dyfishon epërsinë e Nën-21-vjeçarëve të Anglisë. Ndërkaq, në minutën e 63-të, Balogun gjen edhe golin e 3-të të miqve dhe të dytin personal në këtë takim. Në minutën e 67-të del nga loja i dëmtuar portieri Simoni pas një tjetër dëmtimi, duke u zëvendësuar nga Puja, teksa në lojë hyn edhe Syla në vend të Ismajlgecit. Në minutat e fundit trajneri Bushi bën edhe dy zëvendësime të tjera duke hedhur në fushë Bebeqizin dhe Mehmetllarin, por gjysmëora e mbetur e lojës do të shohë anglezët të mbizotërojnë.
Dhe, përtej përpjekjeje të kuqezinjve për të gjetur të paktën një gol ngushëllimi në fund, mbyllet me fitoren 3-0 të Nën-21-vjeçarëve të Anglisë kjo përballje me Shpresat e Shqipërisë. Pas 7 ndeshjesh të luajtura, Shqipëria mbetet në kuotën e 9 pikëve në vendin e 4-t të renditjes së Grupit G.
Kampionati Evropian i Futbollit
(Nën-21-vjeçarët)
Eliminatoret
Shqipëri – Angli 0-3
Shënues: Balogun 47’, 62’, Xhons 51’
SHQIPËRI: Simoni, Ndrecka, Kalaj, Selmani, Mitaj, Marku, Çelhaka, Ismajlgeci, Cara, Dobra, Tuci. Trajner: Alban Bushi
ANGLI: Bursik, Livramento, Koluill, Hejuud-Belis, Xhonson, Gejmër, Xhouns, Gibs-Uajt, Madueke, Gordon, Balogun. Trajner: Li Karsli
