ASNN – Shpresat e Shqipërisë kanë pësuar mbrëmë një humbje të thellë, 1-6, me Portugalinë në “Qemal Stafa” dhe, duke folur për mediat pas ndeshjes, trajneri Redi Jupi tha se gjashtë gola është vështirë të kapërdihen, por skuadra u përpoq përpara një kundërshtari në nivele të tilla. “Portugezët dominuan totalisht dhe natyrisht e merituan fitoren”, – tha ai.
“Patëm tre lojtarë të rinj në formacion, – ka vijuar trajneri i përfaqësueses kuqezi të Nën-21-vjeçarëve. – Strakosha, i cili ka luajtur dy ndeshje me rendësi me ekipin e tij dhe ishte i lodhur. Dy të tjerët erdhën si rezultat i mundësive dhe mungesave që kishim, si Avdijaj dhe Manaj. Nuk është se nuk funksionuan lojtarët, përkundrazi ekipi në përgjithësi u përpoq shumë ndaj kundërshtarëve të tillë”.
Përsa i përket lojës, trajneri i Shpresave ka habitur, kur tha se përdor të njëjtën strategji si De Biazi me Kombëtaren e të rriturve. “Luajmë me të njëjtën lojë si ekipi A, por nuk janë të njëjët lojtarë, – ka thënë ish-lojtari i Dinamos, Tiranës dhe Kombëtares. – Nuk ka ndryshim në fushë, por është mënyra se si interpretohet. Ekipi A është ndërtuar në disa vite. Ju garantoj se kjo nuk është forca reale e kësaj skuadre.
Në momente të caktuara ka lojtarë që e tregojnë vetën dhe duken. Kemi lojtarë të cilët skuadra e vet i mbështet, kështu pse mos ti japim dhe ne besim. Gjashtë gola është shumë vështirë të kapërdihet, dhe pse në momente të caktuar diferenca është shumë e madhe, përsëri gjashtë gola janë shumë”, – ka përfunduar trajneri i Shpresave të Shqipërisë, Redi Jupi.
