ASNN – Ndeshja Shqipëri-Turqi do t’i japë udhë rrugëtimit të kuqezinjve Nën-21-vjeçarë në Eliminatoret e Kampionatit Evropian të kësaj grupmoshe. Dihet që Turqia është një kundërshtar i vështirë dhe me synimin për të zënë një nga dy vendet e para në grup. Për trajnerin e përfaqësueses që njihet ndryshe si Shpresat, Alban Bushi, rezultati në këtë sfidë nuk ka shumë rëndësi, pasi ne nuk kemi pretendime kualifikimi.

Të dielën kombëtarja shqiptare e Nën-21-vjeçarëve do të nisë rrugëtimin për Eliminatoret e Kampionatit Evropian të kësaj grupmoshe. Përballë kuqezinjve Nën-21-vjeçarë do të jenë bashkëmoshatarët e Turqisë. Një ekip i fortë me shumë pretendime për të zënë një nga dy vendet e para në grup. Trajneri i Shpresave, Bushi e pranon këtë fakt, madje thotë se do të bëjnë si gjithnjë lojë sulmuese, jo vetëm të mbrohen.

Për Bushin, barazimi me Turqinë do të ishte një rezultat i mirë. Në ekip mungojnë shumë lojtarë, për shkak të dëmtimeve. Por trajneri Bushi pranon se edhe lojtarët që do t’i zëvendësojnë ata janë përgatitur për ta luajtur si duhet këtë ndeshje. Ndeshja me Turqinë, ku duket se rezultati nuk ka shumë rëndësi për trajnerin kuqezi, do t’i japë atij mundësinë për të bërë shumë ndërrime lojtarësh.

Ndërsa Bushi ka kërkuar mbështetjen e tifozëve në stadium. Ndeshja Shqipëri-Turqi për Nën-21-vjeçarët luhet të dielën në Stadiumin “Elbasana Arena”. Hyrja për tifozët është falas.