ASNN – Kombëtarja shqiptare e Nën-21-vjeçarëve po vazhdon përgatitjet për ndeshjen që do të zhvillojë ndaj Republikës Çeke në fushë të huaj, takim që do të luhet më 6 shtator 2021 dhe që është i vlefshëm për Eliminatoret e Kampionatit Evropian 2023 të kësaj grupmoshe. Skuadra është grumbulluar që prej ditës së diel në Elbasan, aty ku po vazhdon stërvitjet intensive, me nga dy seanca në ditë.
Të enjten, ekipi i drejtuar nga trajneri Alban Bushi ka zhvilluar një ndeshje miqësore ndaj Nën-19-vjeçarëve të Akademisë së Futbollit, ku ka fituar bindshëm me rezultatin 5-0, me kuqezinjtë që ishin dukshëm superiorë gjatë gjithë ndeshjes. Nga dy gola shënuan Karrica e Marinaj dhe të 5-tin e realizoi sulmuesi i Vllaznisë, Mehdi Çoba. Trajneri Bushi aktivizoi këta lojtarë: Molla, Marku, Selmani, Pëllumbi, Ismajlgeci, Çelhaka, Lakti, Mehmeti, Karrica, Nikqi dhe Çoba.
Në pjesën e dytë të lojës, trajneri i kuqezinjve aktivizoi edhe lojtarët e tjerë të grumbulluar për ndeshjen ndaj Republikës Çeke. Por ajo që duhet theksuar është se lista e lojtarëve të grumbulluar nga trajneri Alban Bushi ka pësuar sërish ndryshime. Zyra e shtypit në FSHF ka bërë të ditur se mesfushori Armando Dobra nuk ka udhëtuar drejt Shqipërisë për t’iu bashkuar skuadrës për arsye personale dhe nuk do të jetë pjesë e kuqezinjve në këtë ndeshje.
Edhe Eljon Tuci nuk do të jetë pjesë e skuadrës së drejtuar nga Bushi, pasi i është bashkuar Kombëtares së Nën-19-vjeçarëve të Cungut, që do të zhvillojë ditën e premte në Stadiumin “Selman Stermasi” ndeshjen e parë ndaj Izraelit. Kuqezinjtë do të nisen me 4 shtator drejt Republikës Çeke, aty ku do të provojnë të marrin një rezultat pozitiv. Kjo është ndeshja e dytë për ekipin e Shpresave në kuadër të këtyre Eliminatoreve.
Sfida e parë e luajtur më 4 qershor në Andorra përfundoi në favor të kuqezinjve, me shifrat 0-3.
