ASNN – Shqipëria e Bushit përsërit atë të Panuçit, kuqezinjtë Nën-21-vjecarë munden 2-1 nga “xhonturqit”. Disfata që pësoi Kombëtarja të premten në përballjen e parë eliminatore, kundër Turqisë, në Shkodër, me rezultatin 2-0, la një shije të hidhur tek të gjithë të pranishmit në stadiumin “Loro Boriçi”. Kjo disfatë solli edhe shkarkimin e trajnerit Kristian Panuçi, e në këtë moment delikat pritet të emërohet një trajner i ri që do të sjellë frymë të re për grupin.
Të shtunën ishte një tjetër duel Shqipëri-Turqi, por jo përfaqësuesja e madhe, por ekipi kombëtar i Nën-21-vjeçarëve. Dueli me “xhonturqit” (turqit e rinj) u luajt në Stadiumin “Elbasan Arena” dhe kuqezinjtë e rinj nuk mundën të hakmerreshin për disfatën e të rriturve një ditë më parë në Shkodër. Humbën sërish, këtë herë me rezultatin 2-1. Në të vërtetë ishte një disfatë e pamerituar, sepse ekipi i Alban Bushit bëri më shumë se përfaqësuesja e homologut Panuçi.
Luajti më mirë, arriti të shënojë dhe vetëm një veprim i bukur i turqve bëri të dalin të humbur nga kjo përballje. Ilker Juksel shënoi për turqit e rinj në minutën e 11-të, duke bërë që të vihej në diskutim aftësia e skuadrave tona për të marrë rezultat pozitiv. Megjithatë, kuqezinjtë përtërisin forcat dhe ia dolën të barazonin në minutën e 20-të me anë të Shaqir Tafës. Pas shënimit të golit skuadra e Bushit krijoi edhe raste të tjera shënimi dhe ishte shumë pranë fitores.
Pjesa e parë mbyllet në barazim 1-1, kurse në fillim të dytës, për shumë minuta, kuqezinjtë patën raste të mira shënimi por fati nuk ishte me ta dhe meritë për këtë ka dhe portieri turk. Atëherë kur pritej goli i Shqipërisë së Bushit ndodh e kundërta, ku turqit realizojnë në minutën e 78-të me anë të Berkaj Ozgan, një gol i ardhur pas pasimeve të përkryera dhe një skeme të admirueshme të miqve. Në fund të ndeshjes turqit mbetën me 10 vetë pas daljes me karton të kuq të Kipritit.
Por kjo nuk ndikoi, pasi ishte fundi i lojës dhe kuqezinjtë nuk arritën ta barazonin rezultatin. Për pasojë fitoi Turqia e Nën-21-vjeçarëve, me rezultatin 2-1. Kjo bën që Shqipëria ta nisë me humbje fazën eliminatore të saj në grupin e tretë të “Euro 2021”-shit për këtë grupmoshë, ndërsa më 26 mars 2019, do të luajë në udhëtim ndaj Andorrës, një ditë pasi të luajë Kombëtarja e madhe.
