ASNN – Janë përcaktuar tre futbollistët kandidatë për të fituar “Topin e Artë 2014”, që janë Kristiano Ronaldo, Lionel Mesi dhe Manuel Nojer. Ndërsa për trajnerë këtë trofe do ta diskutojnë Ançeloti, Lëv dhe Simeone. Çmimin “Pushkash”, për golin më të bukur do ta diskutojnë sulmuesja irlandeze Stefani Roshe, kolumbiani Hames Rodrigez dhe holandezi Robin Van Persi.
Çmimet do të jepen në 12 janar 2015 në Zyrih, në një ceremoni që do të sillet për sportdashësit si zakonisht drejtpërdrejt nga Rrjeti i Radio-Televizionit Shqiptar. Kandidatët për të fituar topin e artë 2014, janë dy sulmuesit e Realit të Madridit dhe Barcelonës, Kristiano Ronaldo e Lionel Mesi dhe portieri i Bajernit të Mynihut dhe Gjermanisë, “kampione bote” në 2014, Manuel Nojer.
Mbajtës i këtij trofeu është Kristiano Ronaldo, i cili vitin e kaluar e fitoi duelin Mesin, i cili kishte 4 vite radhazi që e fitonte këtë trofe. Ronaldo dhe Mesi së bashku e kanë fituar “Topin e Artë” në 6 edicionet e fundit. Ndërsa portieri i Bajernit dhe Gjermanisë ndodhet për herë të parë midis tre pretendentëve. Nojeri është protagonisti kryesor që me pritjet e tij i ka dhënë titullin “kampion” Bajernit të Mynihut dhe Gjermanisë në Botërorin “Brazil 2014”.
Tashmë mbetet 12 janari kur në Zyrih do të zbulohet se kush do të fitojë “Topin e Artë”. Kush do të peshojë më shumë, golat në Ligën e Kampioneve të sulmuesit portugez, rekordet e yllit argjentinas apo pritjet e talentit të portës gjermane? Për trajnerë, kandidatë për të fituar topin e artë janë Karlo Ançeloti, Joakim Lëv dhe Diego Simeone, çmim ky që jepet nga FIFA dhe prestigjozja “Francë Futboll”.
Trajneri i Realit të Madridit ka fituar edicionin e fundit të Ligës së Kampioneve. Lëv është “kampion bote” me skuadrën e tij Gjermaninë, ndërsa Simeone është nënkampion i Evropës për vitin 2014 me Atletikon e Madridit. Çmimin “Pushkash” për golin më të bukur do ta diskutojnë Stefani Roshe, sulmuesja irlandeze dhe dy yjet e futbollit botëror, Hames Rodrigez dhe Robin Van Persi, protagonistë absolutë me Kolumbinë dhe Holandën në Botërorin e fundit brazilian.
Dy yjet botërorë padiskutim por që duhet të kenë kujdes nga goli i mrekullueshëm i realizuar nga Roshe.
