ASNN – Ndërkaq, edhe Kosova ka njohur kundërshtaret e saj në grupin e nivelit të 3-të të Ligës së Kombeve, në Ligën C, aty ku do të përballet me Rumaninë, Qipron, por edhe fituesen e çiftit të “play-off”-it që do të luhet në mars midis Lituanisë dhe Gjibraltarit.
Siç dihet tashmë, ndeshja e parë e fazës së grupeve do të luhet në datat 5-7 shtator 2024, ndeshja e dytë në datat 8-10 shtator, ndeshja e 3-të në datat 10-12 tetor, ajo e 4-t në datat 13-15 tetor, ajo e 5-ta në data 14-16 nëntor dhe ndeshja e 6-të dhe e fundit më 17-19 nëntor 2024.
Si për Shqipërinë, edhe për Kosovën pozitiv është fakti se, përveç vendit të parë në grup, që ngjitet automatikisht në Ligën B, edhe skuadra e vendit të dytë në grupet e Ligës C, shkon në një “play-off” me të 3-tën e Ligës B, duke patur kështu një tjetër mundësi për të synuar ngjitjen.
Në fakt, futbollistët e Përfaqësueses së Kosovës në futboll i kanë të freskëta përballjet me Rumaninë dhe Qipron. Rumaninë e kishte në grupin eliminatore për “Euro 2024”, kurse Qipron në edicionin e 3-të të Ligës së Kombeve. Të dyja përfaqësueset do t’i ketë sërish në grup.
Kosova barazoi pa gola ndaj Rumanisë në Prishtinë më 16 qershor 2023, ndërsa humbi në Bukuresht më 9 shtator me rezultatin, 0-2. Në edicionin e kaluar të Ligës së Kombeve, Kosova fitoi dy ndeshjet e saj përballë Qipros. E mposhti në fushë të huaj 2-0 më 2 qershor, ndërsa fitoi 5-1 në Prishtinë më 27 shtator.
Kosova pati fituar në miqësore ndaj Gjibraltarit 1-0 më 10 tetor të vitit 2019, ndërsa fitore pati shënuar edhe ndaj Lituanisë, teksa e pati mposhtur thellë 4-0 në mars të vitit 2021. Ndeshjet e Ligës së Kombeve fillojnë në shtator. Kosova në edicionin e parë të Ligës së Kombeve, 2018-19, kishte garuar në Ligën D, që është niveli më i ulët.
Pasi e kishte fituar grupin, u ngjit në Ligën C, ku u paraqit në edicionet 2020-2021 dhe 2022-2023. Në edicionin e fundit ishte në grup me Greqinë, Irlandën e Veriut dhe Qipron. Greqia e fitoi grupin dhe fitoi në Ligën B, ndërsa Kosova ishte e dyta dhe mbeti në Ligën C.
