ASNN – Shkumbini mund 2-1 Tomorin dhe rifutet sërish në garë për të qëndruar në Kategorinë e Parë, teksa tani është shumë më pranë skuadrave që qëndrojnë më sipër në renditje se bardhekaltërtit. Mjaftuan dy 11-metërsha, të shndërruar në gol nga ana e Isait dhe Llucës, që i dhanë tri pikë shumë të arta skuadrës së drejtuar nga trajneri Ilir Gjyla.
Nga ana tjetër, miqtë shënuan shumë shpejt me Sharavollin, por që nuk ia dolën dot për të marrë të paktën edhe një pikë. Miqtë e nisin menjëherë me vrull takimin, teksa që në minutën e 4-t, Sharavolli do të kalojë të tijtë në epërsi, kur godet fluturimthi në kufinjtë e zonës së rreptësisë. 0-1 dhe vendësit shtangen, sepse nuk e prisnin një rezultat të tillë, aq më tepër që ishin edhe nën trysninë e pikëve.
Mirëpo, dalëngadalë, peqinasit fillojnë të shtyjnë përpara dhe të krijojnë raste, aq sa pas 4 minutash fitojnë një 11-metërsh. Do të jetë Isai ai që merr përsipër goditjen dhe nuk gabon nga pika e bardhë, duke barazuar kështu shifrat në 1-1. Minutat e mbetura të pjesës së parë janë të qeta, me skuadrat që mundohen të krijojnë raste, por që gabojnë në finalizim.
Tomori aplikon më shumë kundërsulmin, ndërsa peqinasit topat e gjatë, por pa sukses. Në fraksionin e dytë të lojës, skuadrat hapen shumë dhe në shumë raste sulmuesit miq dalin të vetëm me portën për shkak të hapësirave të peqinasve që janë hedhur në kërkim të golit, por që tregohen të pasaktë. Në të 70-n minutë ka sërish 11-metërsh për Shkumbinin.
Kuçi e prek një top më dorë si të ishte portier dhe u jep mundësinë vendasve të kalojnë në epërsi. Godet Lluca dhe nuk gabon. Shkumbini kryeson 2-1 dhe ia arrin deri në fund që të administrojë lojën dhe të marrë tri pikë të arta.
Shkumbini – Tomori 2-1
Shënues: Isai 8’(11-m.), Lluca 70’(11-m.) / Sharavolli 4’
Shkumbini: Ajazi, Lundraxhiu, Turhani, Isai, E.Magani, Nexha, Hasa (Sopjani 87’), Lluca, Xhyra, A. Magani, Meta (Lundraxhiu 55’). Trajner: I. Gjyla
Tomori: Vashaku, Bitri, Kuçi, Frataraku, Arbri, Shinko (Dervishi 82′), Papa, Myzyri, Uzuni, Sharavolli, Idrizaj. Trajner: M. Muzhaj.
Gjyqtarë: E. Halo (Memaliaj), P. Puto, G. Bimi (Gjirokastër)
Kartonë të verdhë: Isai / Arbri, Idrizaj, Kuçi (2)
Karton i kuq: Kuçi
