Mbrojtësi shqiptar i Valencias, Shkodran Mustafi, ka thënë se nuk i intereson se në cilin vend do ta përfundojë sezonin skuadra e tij. Atij i intereson që vendi që Valencia do të mbajë në fund, të jetë i mjaftueshëm për t’u kualifikuar në Ligën e Kampionëve.

“Nuk e kemi menduar asnjëherë se në cilin vend duam të jemi, në të tretin apo të katërtin, – ka thënë Mustafi të mërkurën për faqen sportive spanjolle, mundodeportivo.com. – Qëllimi jonë është që të hyjmë në Ligën e Kampioneve.”

“Vendi i tretë do të jetë mirë për ne, meqë do të shkonim direkt, – ka vijuar ai për median në fjalë. – Ne do të mundohemi që, me rezultate pozitive, ta arrijmë këtë qëllim.” Valencia aktualisht është e 4-ta dhe nëse mbetet në këtë pozicion, atëherë duhet që Ligën e Kampionëve ta kërkojë përmes eliminatoreve.