ASNN – Xherdan Shaqiri debutoi të shtunën për Stouk Sitin me një pasim goli, në barazimin e 1-1 që skuadra e tij mori në fushën e Noruiçit, në “Kerrou Roud”. Pas ndeshjes, mesfushori kosovar ka treguar se si ndihej pas këtij debutimi. “Ishte ndeshja ime e parë pas një kohë të gjatë, por jam i gatshëm dhe ndihem mjaft mirë, – deklaroi Shaqiri për faqen zyrtare në Internet të klubit anglez, që njihet me nofkën “Potters”.
“Isha paksa i lodhur në fund të ndeshjes, por megjithatë u ndjeva mirë në ekip dhe mendoj se do na shihni duke u përmirësuar gjatë vazhdimit të sezonit, – vijoi gjilanasi. – Unë e shijova lojën dhe mendoj se ishte një lojë e mirë. Është mëkat që nuk fituam, por gjëja kryesore është se ne nuk humbëm e në fund ishte një pikë e rëndësishme për ne.”
“Kaluam në epërsi me një gol të bukur, por më pas luajtëm ndoshta shumë të tërhequr dhe u jemi mirënjohës pritjeve të (portierit) Xhek, kështu që mendoj se ishte një pikë e mirë për ne”, – theksoi futbollisti kosovar i përfaqësueses zvicerane, që është në fakt edhe blerja më e shtrenjtë e klubit modest. “Natyrisht, ne gjithmonë duam të fitojmë, kështu që javën tjetër shpresoj që ta bëjmë një gjë të tillë”, – premtoi ai.
“Mbështetja ishte e jashtëzakonshme, mbi të gjitha kur u thirr emri im, – pohoi ish-futbollisti i Bazelit, Bajernit dhe Interit. – Do të jetë edhe më mirë kur t’i dëgjojmë ata duke kënduar në fitoret tona dhe jam i sigurt se në ndeshjet e ardhshme ne do ta bëjmë këtë dhe do të vazhdojmë të ecim përpara. Të gjithë kanë qenë mbështetës ndaj meje, që kur kam arritur këtu dhe ndihem mjaft mirë të jem pjesë e tyre.”
“Mirëpo, më e rëndësishme për ne është që t’i marrim tri pikët”, – përfundoi 23-vjeçari, i cili i kushtoi Stouk Sitit plot 17 milionë euro, një transferim rekord absolut për këtë klub anglez.
