ASNN – Super Xherdan Shaqiri, 20 minuta në fushë, dy gola për Liverpulin në fitoren e madhe kundër Junajtid të Murinjos. Xherdan Shaqiri ishte të dielën në mbrëmje heroi i Liverpulit, pasi i dha fitoren skuadrës së trajnerit Jurgen Klop. Ishte një paraqitje mbresëlënëse e shqiptarit, megjithëse tekniku gjerman preferoi ta aktivizojë si zëvendësues në minutën e 70-të.
Kryendeshja midis Liverpulit dhe Mançester Junajtid u luajt në “Enfilld Roud” dhe u duhej “të kuqve” që të rimerrnin kreun e renditjes në Premier Ligë. Në fillim shënoi Sadio Mane, por pa u mbyllur pjesa e parë, Mançester Junajtid barazoi 1-1 me anë të Lingardit. Gjithçka në baraspeshë në pjesën e parë, ndërsa në të dytën 20 minutat e para nuk prodhuan ndonjë ndryshim që do të kishte ndikim në rezultat.
Në këto kushte, trajneri Jurgen Klop hedh në fushë Xherdan Shaqirin, pikërisht në minutën e 70-të. Sulmi merr forcë të madhe, pasi prapa Firminjos dhe Salahut operon pikërisht “Shak”-u. Dhe 3 minuta pas hyrjes së shqiptarit në fushë, vjen goli i epërsisë nga Liverpuli. Një aksion i gjatë nga e majta dhe një devijim i gabuar bën që topi të përfundojë në krahun e djathtë.
Aty ku ndodhet Shaqiri, i cili lëshon “një predhë” me këmbën e djathtë dhe topi i devijuar paksa nga një mbrojtës përfundon në rrjetë, duke bërë që të ngrihen peshë mijërat e të pranishmëve në stadium. Por Shaqiri nuk do të ndalej këtu. Duke përfituar nga dalja përpara e Mançester Junajtid, i cili kërkonte golin e barazimit, vjen një kombinim i përsosur i sulmuesve.
Fillimisht me Firminjon e më pas me Salahun, iu krijua mundësia Shaqirit që këtë herë të ndryshonte vetëm këmbën, pra përdori të majtën, duke tundur sërish rrjetën me një supergol. 3-1 dhe Liverpuli kishte siguruar praktikisht një fitore të madhe, që e rikthen në krye të Premier Ligps dhe e bën atë një pretendent real për titullin. Por, duhet theksuar, pa Xherdan Shaqirin nuk vinte kjo fitore.
Shqiptari nga Gjilani që luan për përfaqësuesen e Zvicrës iu deshën 7 minuta për të përmbysur ekipin e Murinjos dhe për të marrë mijërat e duartrokitjeve në “Enfilld”. Një sukses i merituar dhe lavde të merituara për “xhuxhin” shqiptar të Liverpulit.
