ASNN – Qendra Kulturore e fëmijëve në Lezhë ka organizuar Kampionatin e Shahut për Shkollat 9-vjeçare, atje ku kanë marrë pjesë rreth 40 të tilla. Në këtë veprimtari kanë marrë pjesë thuajse të gjitha shkollat e Lezhës, ndërkohë që organizimi ka qenë i përsosur nën drejtimin e mësuesve të edukimit fizik, që kanë pasur në krye një përgjegjës si Prek Pjetrushi e Mimoza Shtjefni. Bashkëpunimi për këtë veprimtari ka qenë me shoqatën e shahut në Lezhë nën drejtimin e Pashk Markut dhe Mikel Smaçit.
Për gazetat sportive të ditës, Salvador Gjeçi do të deklaronte: “Qendra Kulturore e Fëmijëve në Lezhë ka parashikuar Olimpiada të ndryshe sportive. Ndër këto ishte dhe kampionati i shahut për shkollat 9-vjeçare në Lezhë. Qëllimi ishte gjallërimi i jetës sportive për këto fëmijë dhe mbushja e kohës së lirë për ta. Madje është qëllim dhe çlodhja e tyre nëpërmjet veprimtarive fizike e sportive. E jo vetëm kaq, por kërkuam dhe evidentimin e elementëve të talentuar në shah.”
“Sepse ata do të përfaqësojnë Lezhën në veprimtarive kombëtare, – ka vijuar ai. – Duhet përgëzuar puna e mësuesve të edukimit fizik Altin Shtjefni, Sajmir Kola, Kreshnik Ivanaj, Rigers Nicat, Marie Deda.” Në fund fituesit e kësaj veprimtarie, për vajza janë Antonela Sokoli (shkolla e fshatit Rrilë), Lorena Lala (shkolla “Kosova”), Ueda Meçi (shkolla e fshatit Rrilë). Për djem janë shpallur fitues Ardi Frroku (shkolla “Gjergj Kastriot Skënderbeu”), Dorian Kola (shkolla “Nënë Tereza”), Armando Pjetraj (shkolla EFFATA Pllanë).
Si ekip kupën e ka marrë shkolla “Gjergj Kastriot Skënderbeu”. Në shpërndarjen e diplomave për fituesit ka marrë pjesë Drejtori i Drejtorisë Arsimore Lezhë, si dhe mësues të edukimit fizik. Për fituesit ka pasur dhurata e shpërblime dhe nga presidenti i shoqatës së shahut në Lezhë, Pashk Marku.
