Federata Shqiptare e Shahut, në mbledhjen e radhës të kryesisë, ka zyrtarizuar kombëtaren meshkuj dhe femra, e cila do të marrë pjesë në Olimpiadën Botërore, që do të mbahet nga data 1, deri më 14 shtator 2016, në Bakú.

Sipas Sekretares së Përgjithshme, Majlinda Pilinci, për meshkuj do të jetë trajner Fatos Muço, i cili ka përzgjedhur Erald Dervishin, Dritan Mehmetin, Ilir Seitajn, Llambi Paskun dhe Franc Ashikun.

Ndërkohë për femra, teksa trajner do të jetë Ilir Seitaj, të përzgjedhurat janë Eglantina Shabanaj, Alda Shabanaj, Rozana Gjergji, Bruna Tuzi dhe Suzana Kërçiku. Sakaq në rolin e këshilltarit, të paktën për kombëtaren e femrave, sepse Seitaj do të jetë edhe lojtar vetë, do të jetë Aldo Zadrima.

Ndërsa Sekretarja e Përgjithshme, Majlinda Pilinci, do të jetë përfaqësuese e Shqipërisë në Kongresin Botëror të katrorëve bardhezi, që do të zhvillohet ato ditë në kryeqytetin azer.