Olimpiada e 42-të Botërore e Shahut, që është duke u zhvilluar në Baku të Azerbajxhanit, ka mbërritur në turin e pestë. Por që edhe ky tur ka rezultuar “nul” për djemtë e Fatos Muçës, të cilëve u ka dalë “gungë” Australia. Është lënë pushim Mjeshtri i Madh Ndërkombëtar, Erald Dervishi, ndërsa tavolinë e parë është vendosur Dritan Mehmeti, kurse është rikthyer në formacion Franc Ashiku.
Pikërisht tavolina e parë dhe e katërt ka arritur të dalë barazim, ndërsa jemi mundur në të dytën ku ishte Llambi Pasku dhe në të tretën ku ishte Ilir Seitaj. Për t’u evidentuar është fakti se Australia ka pasur 3 mjeshtër të mëdhenj ndërkombëtarë, ndërsa ka natyralizuar dhe dy kinezë. Parë kështu, për kuqezinjtë kanë qenë krejtësisht e pamundur, ndërsa pësohet humbja e 3-të.
Dhe, me 4 pikë në 5 raunde, Shqipëria është në vendin e 101-të mes 150 konkurrentëve. Në pikë tavolinash kemi 9, që janë përkatësisht: Erald Dervishi 1.5 pikë në 4 ndeshje, Dritan Mehmeti 3.5 pikë në 5 ndeshje, Llambi Pasku 0.5 pikë në 3 ndeshje, Ilir Seitaj 2 pikë në 4 ndeshje, Franc Ashiku 1.5 pikë në 3 ndeshje. Sot do të jetë pushim dhe të enjten kuqezinjtë do të përballen me Mozambikun
Olimpiada Botërore e Shahut
Baku – Azerbajxhan 2016
Rezultatet teknike të turit të pestë:
Meshkuj
Australi – Shqipëri 3-1
K. David Smerdon (MM) – Dritan Mehmeti 0.5-0.5
Zhao Zong-Juan (MM) – Llambi Pasku 1-0
Li Moultun (MN) – Ilir Seitaj 1-0
Maks Ilinguorth (MM) – Franc Ashiku 0.5-0.5
