Pasi ka barazuar me Alda Shabanajn në turin e parë, dje ka mundur pretendenten për titull “kampion”, Eglantina Shabanaj, në një finale ushtarësh. Tek meshkujt rivaliteti më i madh për titull pas dy turesh. Suzana Kërçiku mund të cilësohet surpriza e kampionatit. Sepse pasi ka barazuar me Alda Shabanajn në turin e parë, dje ka bërë surprizën tjetër, teksa ka fituar me pretendenten për titull, Eglantina Shabanaj. Në një finale ushtarësh, ndërsa Kërçiku luante me të bardha, jo vetëm që ka arritur të dalë në mbretëreshë me ushtarin e “h”-së, por pasi e ka vënë nën presion mbretin e zi, ka arritur që t’i rrëmbejë dhe ushtarin e fundit Shabanajt.
Dhe me dy ushtarë të bardhë, të cilët jo vetëm forconin pozitën e mbretit, por në çdo moment në depërtimin e tyre në fushën e kundërshtarit mund të shndërroheshin në damë, atëherë Shabanaj është dorëzuar. Sepse nuk ka pasur rrugë tjetër. Kjo ka qenë surpriza e ditës së dytë, por dhe e kampionatit, ndërsa Suzana Kërçiku është vetëm gjashtëmbëdhjetë vjeç. I ati i Eglantina Shabanajt, Lefteri, trajner, por njëkohësisht dhe shahist veteran, ka pasur dhe një koment: “Shahistët “kampion” nuk duhet të mjaftohen vetëm me ELO-n që kanë, apo me pozicionin e mirë në renditje, por duhet të shohin dhe më përpara.”
“Sepse gradualisht po vjen forca e re që tashmë di të bëjë dhe surpriza”, – ka shtuar ai. E kampionati i femrave kryesohet nga Suzana Kërçiku dhe Alda Shabanaj secila me nga një 1.5 pikë e gjysmë. “Kampione” në fuqi është Rozana Gjergji. Për meshkuj rivaliteti duket më i madh, edhe për faktin se kryesojnë gjashtë shahistë me nga dy pikë secili. Bëhet fjalë për Aleksandër Pacin, Timoleo Miçon, Llambi Paskun, Dritan Mehmetin, Franc Ashikun e Ilir Seitajn, të cilët i kanë fituar dy ndeshjet e para. Kampion në fuqi është Dritan Mehmeti, ndërsa kampionati individual i shahut është duke u zhvilluar në Qendrën Rinore në Tiranë në Rrugën e Kavajës pranë Dhomës së Tregtisë dhe Industrisë, ndërsa ndeshjet luhen nga ora 16:00, deri në ora 20:00.
Kampionati Kombëtar i Shahut 2015
Rezultatet teknike:
Meshkuj
Turi i parë:
Beqiri – Paci 0-1
Seitaj – Bregu 1-0
Ashiku – Disha 1-0
Mehmeti – Rama 1-0
Pasku – Bushi 1-0
Miço – Kabo 1-0
Turi i dytë:
Paci – Kabo 1-0
Bushi – Miço 0-1
Rama – Pasku 0-1
Disha – Mehmeti 0-1
Bregu – Ashiku 0-1
Beqiri – Seitaj 0-1
Femra
Turi i parë
Shqau – Tuzi e shtyrë
Caka – O. Shqau 0-1
Shabanaj – Kërçiku 0.5-0.5
Shabanaj – Shuqja 1-0
Gjergji pushim
Turi i dytë
Kërçiku – E. Shabanaj 1-0
Shqau – A. Shabanaj 0-1
Tuzi – Caka e shtyrë
Gjergji – Shqau 1-0
Shuqja pushim
