Kupa e Evropës në shah për klubet, të paktën edhe sipas lajmërimit të Federatës Evropiane të Shahut, do të zhvillohet sivjet në Rejkjavik të Islandës, nga data 12, deri më 23 nëntor 2015.
Kampione në fuqi e meshkujve në Shqipëri është Naftëtari, por duke qenë se pjesëmarrja është me para, teksa vetëm një ekip meshkujsh duhet të paguajë 260 euro për pjesëmarrje (4 lojtarë+1 rezervë) atëherë gjërat duken të pamundura.
Sepse skuadrat pjesëmarrëse, gjithnjë sipas rregullores së aktivitetit të shfaqur dje nga Federata Shqiptare e Shahut, nëse nuk konfirmojnë hotelin deri më 1 gusht (tashmë kjo datë ka kaluar) akomodimin do ta kenë me paratë e tyre.
Pa thënë këtu dhe udhëtimin. E në pamundësi për t’u paguar nga Federata Shqiptare e Shahut, e cila sidoqoftëë buxhetin e ka të kufizuar, duket se pjesëmarrja e sivjetshme e Naftëtarit dhe e klubeve shqiptare në shah do të jetë e pamundur.
Sakaq është konfirmuar pjesëmarrja në Asamblenë e FIDE-s, si dhe pjesëmarrja e të rinjve në Evropian në Porec.