Kampionati Evropian i Moshave 8-18 vjeç në Shah, që është duke u zhvilluar në Poreç të Kroacisë, dje ka luajtur turin e tij të tretë. Më e mira e Shqipërisë, Klean Shuqja, në grupmoshën e Nën-10-vjeçareve, ka barazuar përballë kandidates për kandidate mjeshtre, ruses Galina Mironenko. Ka qenë një ndeshje mes rivalësh, ndërsa të dyja kanë ruajtur kreun dhe janë në të njëjtën kuotë pikësh 2.5.
Ndërkohë ka barazuar dhe Pirro Marko tek djemtë e Nën-12-vjeçarëve, teksa ka pasur përballë lituanezin Benas Mickus. Ashtu sikurse ka bërë edhe Zino Veleshja tek Nën-14-vjeçarët, i cili ka pasur përballë ukrainasin Artur Janishkin. E në turin e tretë ka ardhur dhe fitorja e parë për Timoleo Miçon, tek Nën-18-vjeçarët, teksa ka triumfuar përballë danezit Bjarke Vangsgard.
Pjesa tjetër e ekipit e gjitha ka dalë me humbje. Kështur për Nën-16-vjeçarët djem, Tedi Shpati është mundur nga gjermani Leonid Saulin. Po kështu për Nën-10-vjeçarët, Vito Deni është mundur nga ukrainasi Maksim Smirnov. Për Nën-8-vjeçarët, Adrian Guri ka humbur ndaj rusit Nikolai Shmirev, kurse për Nën-16-vjeçaret vajza, Suzana Kërçiku ka humbur me polaken Ana Karikovska.
E gjendja e pikëve për tanët pas 3 turesh është: Shuqja 2.5 pikë, Miço 1 pikë, Shpati 1 pikë, Veleshnja 1.5 pikë, Marko 0 pikë, Deni 1 pikë, Guri 0 pikë, Kërçiku 0.5 pikë.
