Klean Shuqja, shahistja e Shqipërisë në grupmoshën deri në dhjetë vjeç, duket se është lodhur në Kampionatin Evropian të Moshave në Shah, që është duke u zhvilluar në Poreç të Kroacisë. Pikërisht në raundin e shtatë, pas tre fitoreve dhe tre barazimeve, Shuqja ka pësuar humbjen e parë, ndërsa është mundur nga rusja Elena Mikhailina. E duke mbetur kështu në kuotën 4.5 pikë, teksa janë dhe dy ture për t’u luajtur, duket e vështirë që të jetë në vendet e para.
Ndonëse paraqitja e saj mbetet më e mira për Shqipërinë në këtë Evropian. Ndërkohë ka qenë ditë e mbarë për të gjithë të tjerët, ndërsa janë shënuar 5 fitore dhe dy barazime. Në grupmoshën deri 18 vjeç për djem, Timoleo Miço ka fituar ndaj francezit Dilan Vienot, i cili është Mjeshtër i FIDE-s. Më pas tek Nën-14-vjeçarët djem, Zino Veleshnja ka fituar ndaj danezit Nikolai Kistrup. Për të vijuar po kështu me Vito Deni, që tek Nën-10-vjeçarët djem, ka fituar ndaj sllovenit Peter Knavs.
E suksesi ka ardhur dhe Adrian Guri, që për moshën deri në 8 vjeç ka fituar ndaj belgut Pjotr Kapan. Dhe fitorja tjetër është e Suzana Kërçikut, që ka mundur finlandezen Ebeling Mikaela. Sakaq janë dhe dy barazime, Tedi Shpati ndaj italiani Leonardo Renxeti dhe Pirro Marko ndaj rumunit Marian Juravle Mihnea. Pas 7 turesh gjendja e pikëve të shahistëve tanë është si vijon: Klean Shuqja 4.5 pikë, Zino Veleshnja 4 pikë, Timoleo Miço 3.5 pikë, Vito Deni dhe Suzana Kërçiku 3 pikë, Tedi Shpati dhe Pirro Marko 2.5 pikë, Adrian Guri 2 pikë.
