ASNN – Natyrisht që vetëm bashkimi bën fuqinë dhe të gjitha 20 klubet e Serie A kanë votuar për të përfunduar edicionin, ndonëse kishte raporte se disa klube ishin kundër kësaj. Ishte raportuar se Torino dhe Breshia kanë kërkuar të ndërpritet edicioni, duke shkaktuar përplasje në mes të qeverisë, Federatës dhe 18 klubeve tjera. Por Liga e Serisë A ka njoftuar të premten se, pas një video-konference të mbajtur gjatë ditës së premte, është konfirmuar se dëshirë e të gjitha klubeve është që të përmbyllet edicioni në fushën e blertë.
Takimi ishte thirrur për të adresuar çështje që kanë të bëjnë me të drejtat televizive. Ka pasur kërcënime që edicioni të anulohet nga qeveria nëse Federata e Futbollit të Italisë nuk modifikon protokollin për të përmbushur të gjitha kërkesat që kanë të bëjnë me sigurinë e lojtarëve dhe trajnerëve. Synimi është që, më vonë këtë muaj, skuadrat të kthehen në stërvitje, kurse edicioni të vazhdojë gjatë qershorit. Liga e Serisë A ka zhvilluar një video-konferencë dhe unanimisht klubet e kampionatit elitar në Itali kanë vendosur se duan ta përfundojnë këtë sezon futbollistik.
Gjatë asamblesë së sotme është paraqitur edhe një protokoll tjetër sigurie, që do t’i paraqitet Komitetit Shkencor të krijuar nga qeveria. Tashmë duhet që palët të bien për këtë protokoll, në mënyrë që autoritetet të japin miratimin për rifillimin e përgatitjeve. Protokolli i parë ishte konsideruar i pamjaftueshëm nga ana e Komitetit Shkencor. Ndërkohë është menduar edhe për një kalendar që sezoni të mbyllet në kohën e duhur, sipas sugjerimit të UEFA. Ideja është të rifillojë kampionati më 9 dhe 10 qershor, data ku mendohet të zhvillohen duelet gjysmëfinale të Kupës së Italisë.
Duke u përkushtuar më pas te 12 javët e mbetura të kampionatit, 4 ndeshjet e prapambetura dhe finalja e Kupës së Italisë. Është e vështirë që të luhet pas datës 2 gusht, pasi UEFA dëshiron të mbyllë veprimtaritë evropiane të klubeve pas kësaj date. Nëse Kupa e Italisë nuk do të ketë një fitues, atëherë vendi i 7-të në kampionat do të shkojë në Kupat e Evropës.
