ASNN – Rekord për “Guinness”, braziliani Koxas hyn në historinë e sërfit për kapërcimin e dallgës më të madhe. Pas afro 3 muajsh marrin fund dilemat për rekordin e sërfit në kapërcimin e dallgëve. Është braziliani Rodrigo Koxas që ka marrë miratimin nga Federata Botërore e Sërfit, si njeriu që ka kapërcyer dallgën më të madhe, në një lartësi prej 24.4 metra, rezultati më i mirë i regjistruar ndonjëherë në historinë e “kalërimeve” në dallgët e mëdha.

Ylli brazilian e regjistroi këtë rezultat fantastik më 8 nëntor të vitit të kaluar, në brigjet e Nazares të Portugalisë, duke kapërcyer një super-dallgë të lartë me “fluturaken” e tij, e cila ia doli ta mbajë atë në vijën kulmore të dallgës dhe vetë braziliani të arrijë pikën kulmore të dallgëzimit. Ndodh rrallë që të apasionuarit pas sërfit të kapin nivele të tilla lartësie.

Aty ku sportisti në kulmin e dallgës duket sikur është në majën e një pallati dhjetëkatësh dhe zbritja kundrejt një këndi duke “kalëruar” është momenti më kritik i këtij sporti. Në fillim federata botërore kishte kërkuar prova shtesë dhe kishte hezituar ta regjistronte rezultatin, por pasi mblodhi informacionin dhe të dhënat anësore, arriti në konkluzionin se Koxas kishte arritur një rezultat të pabesueshëm dhe ky rezultat prej 24.4 metra lartësi është për librin “Guinness”.

Sërfi është një sport që lidhet fort me pasionin sesa me arritjen e rezultateve dhe ndodh shpesh që futet në rangun e sporteve ekstreme sesa veprimtaritë normale sportive.