ASNN – Të menjëhershëm kanë qenë edhe reagimet e krerëve të shtetit dhe politikës. Kryeministri Edi Rama ka shkruar në rrjetin social “Facebook”: “Krenar për kuqezinjtë që përsa pati futboll fituan me lojë e me raste. Keqardhje për fqinjët që lanë nam botërisht me shfaqjen e shëmtuar”. Nga Gjeneva, ka reaguar dhe Kryetari i Kuvendit, Ilir Meta sa i takon incidenteve të ndodhura sonte në fushën e gjelbër të stadiumit në Beograd, ku luhej Serbi-Shqipëri.
Meta ka kërkuar që të gjithë autorët e dhunës të vihen para përgjegjësisë. Më tej, Meta ka uruar Kombëtaren Shqiptare, duke e uruar atë për lojën. “Krenar për Kombëtaren tonë. Një lojë e shkëlqyer në një klimë antisportive. Jemi pranë futbollisteve dhe familjeve të tyre. Autorët e dhunës të vihen para përgjegjësisë. Të gjithë jemi mirë, o sa mirë me qenë shqiptar. Shqipëria është vendi me i bukur në botë”, – thuhet në reagimin e Metës.
Ministri i Jashtëm, Ditmir Bushati ka shkruar në rrjetin social “Twitter se: “Jemi të zhgënjyer nga ngjarjet në Beograd. Futbolli nuk duhet të merret peng nga ekstremizmi. Krenar për skuadrën tonë shqiptare. Treguan kurajo dhe maturi.” Ndërkohë, Ministria e Punëve të Brendshme në vijim të ndjekjes me shqetësim të zhvillimeve në stadiumin e Beogradit ka kontaktuar me zyrtarët më të lartë të Ministrisë së Brendshme Serbe, të cilëve u është përcjellë mesazhi i ministrit Sajmir Tahiri.
“Qeveria serbe mban përgjegjësi për sigurinë e jetës dhe shëndetit të lojtarëve dhe stafit teknik të kombëtares shqiptare të futbollit ashtu si edhe për sigurinë e jetës së çdo mbështetësi dhe qytetari shqiptar në stadiumin e Beogradit. Ministri Tahiri kërkoi të merren urgjentisht të gjitha masat për të garantuar sigurinë e të gjithë shtetasve shqiptarë të pranishëm të stadium”, përfundon mesazhi i Ministrit Tahiri.
Edhe kreu i opozitës Lulzim Basha ka reaguar në rrjetin social “Facebook” ku i ka dhënë mbështetje Kombëtares Shqiptare. “Përpara shqipe”, – citohet në mesazhin e Bashës. Interesant ka qenë edhe statusi i Pandeli Majkos i cili thotë: Pa koment… Historia mundi futbollin.
