ASNN – Reali i Madridit e nis 2024-ën me një përballje të mërkurën në shtëpi me Majorkën, dhe, duke folur në prag të saj, Karlo Ançeloti prekur një sërë temash. Ai ka folur për përvojën e tij në “Santiago Bernabeu”, për Kilian Mbapenë dhe për ofertën që e kishte nga përfaqësuesja e Brazilit, të cilën në fund e refuzoi pasi e zgjati kontratën me gjiganden spanjolle deri në vitin 2026. Kështu, Karlo Ançeloti ka folur të martën gjerë e gjatë për situatën aktuale tek Reali i Madridi, përfshirë këtu lojtarët që janë në përfundim të kontratës, por edhe për mbrojtjen madrilene
“E dua Real Madridin dhe dua të rri këtu, – ka thënë Ançeloti. – Mund të rri këtu edhe pas karrierës si trajner. Kisha kontakte me Brazilin, natyrisht,. por gjithçka kishte mbetur në “vend-numëro”, pasi gjithmonë isha duke e pritur Realin e Madridit. Jam i lumtur të qëndroj këtu.” Duke folur më tej në konferencën për shtyp para ndeshjes së të mërkurës në kampionat me Majorkën, trajneri italian preku edhe çështjen e Toni Krosit, Naços dhe Luka Modriçit, që kanë kontratë vetëm deri në fund të qershorit të këtij viti. “Ata mund të vendosin se çka duan të bëjnë”, – ka thënë italiani i stolit madrilen.
“U takon atyre të vendosin, ua kemi dhënë të drejtën të vendosin vetë, – ka vijuar ai. – E ardhmja është tashmë në rrugën e duhur me shumë talente dhe Endrik do të vijë gjithashtu shumë shpejt këtu.” Ançeloti u pyet edhe për Kilian Mbapenë, i cili në verë do të jetë lojtar i lirë pasi do t’i skadojë kontrata me Paris SG-në, por u përgjigj: “Nuk do të komentoj për këtë çështje. S’kam koment, ju duhet ta dini se ne nuk flasim për këtë.” Kohët e fundit, Realit iu dëmtua njëri prej mbrojtësve kryesorë, David Alaba.
Por, përkundër mungesave në qendër të mbrojtjes, Ançeloti nuk e sheh të nevojshëm transferimin e ndonjë lojtari tjetër. “Ne nuk po mendojmë ta transferojmë ndonjë qendërmbrojtës në këtë moment, – ka thënë ai. – Ne i kemi Naçon dhe Rudigerin si qendërmbrojtës. Gjithashtu, kemi edhe Tshuamenin e Karvahalin, të cilët mund të luajnë si qendërmbrojtës.” Reali i Madridit mban kreun e renditjes pas 18 javësh në kampionatin spanjoll.
