ASNN – Shumë para, shumë alkol, që sjellin shumë gjëra të tjera të këqija. Historia e futbollit është plot me lojtarë që kanë abuzuar me fizikun e tyre, duke e mbushur me pije alkoolike. Përveç Xhorxh Best, që mbetet emblema e këtij abuzimi, ai ka edhe shumë shokë të tjerë të këtij lloji. I fundit që ka abuzuar me alkoolin është Rio Ferdinand, që sot është opinionist, e që vajton faktin se si kanë shkuar gjërat kur ka qenë futbollist. Numri i trofeve të fituar nuk hyn fare këtu, por të vishje bluzën e Mançester Junajtid ka patur dobinë e vet në këtë drejtim.
Rio do të donte të kujtonte gjithçka, por disa pjesë të jetës së tij janë fshirë, sepse në moshën djaloshare ka pirë shumë alkool. Ka rrezikuar shumë për shkak të alkoolit, që kur ishte një nga yjet e Uest Hemit. Në sezonet e luajtura në “Apton Park”, Rio Ferdinand ka përdorur shumë bërrylat, e jo vetëm në fushë, e për këtë sot i vjen shumë keq. Ish-mbrojtësi ka treguar ndodhitë e tij në mikrofonin e “The Guardian”: “Kur isha i ri, isha i çmendur. Jam konfuz për disa pjesë të karrierës time, njerëzit flasin për disa momente të lojës, e unë ulem dhe mendohem.”
“Nuk e kam idenë se për çfarë po flasin, nuk më kujtohet”, – pohon ish-qendërmbrojtësi shtatlartë. E atëherë ai vazhdon: “E kam ekzagjeruar. Mund të pija, 8, 9, 10 gota me birrë. Pastaj kaloja te vodka. Mund të rrija gjithë ditën duke pirë.” Çfarë do të kishte ndodhur nëse nuk do ta kishte ekzagjeruar kaq shumë? Ferdinand ka prekur fundin gjatë viteve me Uest Hemin dhe për këtë i vjen keq. “Atëherë ekzistonte një kulturë tjetër, ndryshe nga kjo sot, – kujton ai. – Kur isha me Uest Hemin mendonim për futbollin, duke pirë në klubet e natës.”
“Njerëzve që më pyesin a kam ndonjë peng si lojtar, iu them se nuk duhet të pija aq shumë alkool, – vijon ish-futbollisti. – Sot kanë ndryshuar shumë gjëra, futbollistët bëjnë një jetë më të shëndetshme, meritë kjo e trajnerëve të huaj, që në 20 vitet e fundit kanë arritur të zëvendësojnë kulturën britanike me të cilën u rritëm dikur në Premier Ligë”. E në fund Ferdinand tregon: “Kam qenë me fat sepse kam patur një aftësi natyrale për ta kaluar atë periudhë të jetës time”. Pra Rio ka rrezikuar shumë përpara se të bëhej Ferdinand, legjenda e Mançester Junajtid.
