ASNN – Basketbollisti i famshëm spanjoll, Pau Gasol, ka kërkuar nga autoritetet përkatëse qartësi lidhur me shpërthimin e virusit “Zika” në Brazil, para se të vendosë nëse do të garojë në Lojërat Olimpike në Rio de Zhaneiro, në gusht të këtij viti. Qendra e skuadrës së NBA-së, Çikago Bulls, ka përfaqësuar vendin e tij në tri edicionet e kaluara të Lojërave Olimpike.
Por ai thotë se nuk ka informata të mjaftueshme për shpërthimin e virusit që është i lidhur me defekte serioze në lindje. “Unë ndiej përgjegjësi për të rritur ndërgjegjësimin dhe për t’u informuar për diçka që nuk po flasim mjaftueshëm dhe që është shumë e panjohur, – ka thënë 35-vjeçari, i cituar nga “Reuters”. – Lojërat Olimpike mund të jenë mundësi për këtë virus që të përhapet.
“Unë dua që shëndeti i sportistëve, tifozëve dhe familjeve që udhëtojnë në Rio të jetë në rend të parë, – ka këmbëngulur basketbollisti iberik. – Nuk do të më befasonte mua nëse sportistë të caktuar vendosin që të mos marrin pjesë në mënyrë që mos të rrezikojnë shëndetin e tyre dhe të familjeve të tyre.” I pyetur nëse ai është midis atyre sportistëve që po shqyrton mundësinë e mospjesëmarrjes, Gasol ka qenë i qartë.
“Unë jam duke e shqyrtuar këtë si çdo sportist apo person tjetër që po mendon të shkojë në Rio, – ka sqaruar ai. – Disa nga bashkëlojtarët e mi janë duke menduar të nisin një familje në të ardhmen e afërt dhe ata nuk mund të rrezikojnë shëndetin e fëmijëve të tyre apo bashkëshorteve.” Organizata Botërore e Shëndetësisë (WHO) ka refuzuar një ftesë të shtunën për të dhënë alarmin se Lojërat Olimpike duhet të shtyhen.
