7 medalje në 4 gara, prej të cilave 3 të arta, 2 të argjendta dhe 2 të bronzta, ndërsa kështu kanë lënë fare pak për të tjerët. Ilejn Tompson, e vetmja që ka bërë çudinë dje. Dita e 6-të e atletikës në Lojërat Olimpike “Rio de Zhaneiro 2016” ka qenë e dominuar totalisht nga Shtetet e Bashkuara të Amerikës. Në 4 gara, 7 medalje të fituara, 3 ari, dy argjendi dhe dy bronzi, tregojnë se dominimi i amerikanëve jo vetëm në atletikë, por dhe në sportet e tjera është i dukshëm.

Ka bërë dallimin Ilejn Tompson, e artë në 100 metra dhe 200 metra, një xhamajkiane e pakapshme. Një ditë e 6-të pa rekorde bote dhe olimpike, por që në të vërtetë ka qenë dita e Amerikës në atletikë. Me një kërcim 7.17 metra në kërcimin e saj të 5-të, rekord për të personal, Tiana Bartoleta ka marrë medaljen e artë në kërcimin së gjati për femra. Kampionia në fuqi e botës ka parakaluar bashkëatdhetaren e saj, Britni Riis, që në kërcimin e fundit pat arritur 7.15 metra.

Serbia Ivana Spanoviç me një kërcim 7.08 metra ka kompletuar podiumin.  Ndërkohë, Kampionia e botës më 2013-ën, Briana Rollins është shpallur “kampione olimpike” edhe në 100 metra me pengesa të mërkurën, ndërsa e ka fiksuar kronometrin në 12”48. Amerikania 25 vjeç ka mbërritur në finishin e garës përpara dy bashkatdhetarëve të saj, Nia Ali, me 12”59, dhe Kristi Kestlin, me 12”61. Britanikja Sindi Ofili ka qenë nën këmbët e podiumit me 12”63.

Kampionia e Evropës më 2013-ën, britanikja tjetër Tifani Porter e ka mbyllur në vendin e shtatë në kohën 12”76.  Një tjetër amerikan, Kerron Klementi, është shpallur të enjten “kampion olimpik” në 400 metra me pengesa. Me rezultatin 47 sekonda e 73 të qindtat, ai ka qenë përpara kenianit Bonifejs Musheru. Klement ka pasur kohën më të mirë në gjysmëfinale.

Lojërat e 31-ta Olimpike “Rio 2016”

Rezultatet teknike të ditës së gjashtë të atletikës:

Kërcim së gjati – Femra

1)         Tiana Bartoleta (SHBA)                  7.17 metra

2)         Britnei Rese (SHBA)                       7.15 metra

3)         Ivana Spanoviç (Serbi)                   7.08 metra

200 metra – Femra

1)         Elaine Tomson (Xhamajka)           21”78

2)         Dafne Shipers (Holanda)               21”88

3)         Tori Bovie (SHBA)                           22”15

100 metra me pengesa – Femra

1)         Briana Rollins (SHBA)                    12”48

2)         Nia Ali (SHBA)                                 12”59

3)         Kristi Kastlin (SHBA)                       12”61

400 metra me pengesa – Meshkuj

1)         Kerron Klement (SHBA)                 47”73

2)         Bonifejs Musheru Tumiti (Kenia)  47”78

3)         Jasmani Kopelo (Turqi)                  47”92