Viti 2016 konsiderohet se ishte vit i suksesshëm për sportin e Kosovës dhe ndërkombëtarizimin e tij. Pranimi një vit më parë, më 2015-ën, i Komitetit Olimpik të Kosovës (KOK), në Komitetin Olimpik Ndërkombëtar (IOC), kishte hapur rrugën për pranimin e të gjitha federatave sportive në federatat përkatëse botërore. Por, për shkak të pengesave juridike dhe politike, Kosova ende nuk kishte arritur të bëhej pjesë e familjes evropiane dhe botërore në sportin që konsiderohet më i popullarizuari në botë, futbollit.

Megjithatë, lobimi për disa vite i Federatës së Futbollit të Kosovës, por edhe i faktorëve tjerë përkatës, që Kosova të bëhej pjesë e mekanizmave ndërkombëtarë të futbollit, u kurorëzua me sukses në muajin maj të vitit 2016. Më 3 maj, pas aplikimit të Kosovës për t’u pranuar në Bashkimin e Federatëve Evropiane të Futbollit (UEFA), kjo e fundit, në Kongresin që mbajti ne Budapest, me 28 vota për, me 24 kundër dhe me dy vota të abstenuara, e ka pranuar Kosovën si anëtaren e 55-të në këtë organizëm, me të drejta të plota.

Menjëherë pas kësaj ngjarjeje, kryetari i Federatës së Futbollit të Kosovës, Fadil Vokrri, i pati thënë Radios “Evropa e Lirë” se futbolli i Kosovës e fitoi betejën e vështirë, duke e quajtur drejtësi të vonuar. “Për ne të gjithë, është një moment historik, i arritur me shumë mund, – ka thënë kreu i organizmit që qeveris futbollin e Kosovës, duke folur për median në fjalë. – Pra, ne arritëm sot që të bëhemi anëtar i plotë i Federatës Evropiane UEFA.”

“Tashmë janë rrugët e hapura që, pas një jave, më 12 dhe 13 (maj 2016) të jemi edhe në FIFA, çka do të na çonte edhe drejt pjesëmarrjes në Eliminatoret e Kampionatit Botëror”, – pati shtuar Vokrri. Pritshmëria që kishte shprehur Vokrri, si dhe të gjithë dashamirët e futbollit të Kosovës, për pranimin në Federatën Botërore të Futbollit (FIFA), u bënë realitet më 13 maj 2016, në Kongresin e 66-të të këtij organizmi, që është mbajtur në Meksikë. Nga 205 vendet që morën pjesë në procesin e votimit, 141 prej tyre votuan për pranimin e Kosovës në FIFA.

“Ne kemi 86 %, pra shumicën, në favor të propozimit për pranim të Kosovës. Urime për Federatën e Futbollit të Kosovës për ardhjen e saj si anëtarja e 210 e FIFA-s”, – kishte thënë Markus Katner, zëvendëssekretari i përgjithshëm i atëhershëm i FIFA-s, i cili kishte udhëhequr seancën. Po atë ditë, nënkryetari i FFK-së, Agim Ademi, duke folur për Radion “Evropa e Lirë”, pranimin e Kosovës në FIFA e kishte përshkruar si moment i shënuar për Kosovën dhe futbollin e saj. “Krejt kjo tregon që është mbivotuar një e padrejtë që i është bërë Kosovës, deri më tani”, – ka thënë ai.

Vijon nesër…