Duke u ndalur tek sportistët tanë, Sekretari i Përgjithshëm i Federatës Shqiptare të Qitjes, Koço Mikerezi, ka bërë të ditur se Arben Kuçana i ka të gjitha shanset për të qenë në Lojërat Olimpike “Rio de Zhaneiro 2016” me normë kualifikimi. “Veprimtaria kryesore për t’u kualifikuar për në këto Lojëra është Kampionati Evropian i Qitjes, që do të mbahet në Holandë më 3 mars, atje ku do të marrë pjesë si Kuçana, ashtu dhe Cerina”, – ka theksuar ai.
“Jo vetëm kaq, por janë dhe katër kupa të Botës në Shtetet e Bashkuara të Amerikës, Korenë e Jugut, Gjermani, Azerbajxhan, – ka vijuar Mikerezi. – Pa thënë që janë dhe Lojërat Olimpike të Evropës në Baku. Në këto kushte me atë buxhet që kemi do të mundohemi t’i bëjmë të gjitha. Por them se është Kuçana pranë normës së kualifikimit, sepse mori medaljen e bronztë. Hyri në finalen tjetër me 575 pikë dhe u dogj në finale për një gabim.
“Dhe kushtet e stërvitjes i ka më të mira. Por kjo nuk do të thotë se edhe të tjerët nuk do të kenë mundësi kualifikimi. Por Kuçana, të paktën me atë që dha në Kuvajt, i ka këto mundësi. Duhet kuptuar që ishte dhe gara e parë e këtij viti dhe duhet të presim më tej paraqitjen e tyre në Holandë. Por si aktivitet dhe si pritje që na u bë në Kuvajt ishte e rrallë”, – ka përfunduar Sekretari i Përgjithshëm të Federatës Shqiptare të Qitjes, Koço Mikerezi.
