ASNN – Organizmi që qeveris futbollin evropian, UEFA, ka njoftuar se Komiteti i saj Ekzekutiv do ta mbajë një mbledhje javën e ardhshme për të diskutuar përsëri për mënyrat sesi mund ta përmbyllë sezonin 2019-2020, në një kohë krize të shkaktuar nga epidemia globale e koronavirusit Futbolli anembanë kontinentit të vjetër është pezulluar për kohë të pacaktuar si pasojë e “Covid-19”-ës. Të gjitha kampionatet kryesore të vendeve evropiane, por edhe Liga e Kampioneve dhe ajo Liga e Evropës janë pezulluar prej mëse një muaji, për shkaqe të sigurisë së shëndetit publik.
Ende nuk është gjetur ndonjë zgjidhje sesi të përmbyllet sezoni, apo nëse sezoni të shpallet i pavlefshëm. Organi qeverisës i futbollit kontinental njoftoi se Komiteti Ekzekutiv i tij të mbajë një mbledhje nëpërmjet videol-konferencës të enjten, më 23 prill 2020, për të diskutuar rreth zhvillimeve më të reja në lidhje me ndikimin e shkaktuar nga koronavirusi në futbollin evropian. Midis temave të diskutimit do të jetë edhe gjetja e një zgjidhjeje për ta përmbyllur sezonin aktual dhe për mënyrën më të mirë për ta organizuar sezonin 2020-2021 të Ligës së Kampioneve dhe Ligës së Evropës.
Në fakt, Bashkimi i Federatave Evropiane të Futbollit (UEFA) ende po punon në drejtimin që edicioni aktual, 2019-2020, i Ligës së Kampioneve, të përfundojë më 29 gusht. Për këtë qëllim, Komiteti Ekzekutiv i UEFA-s do të ketë një video-konferencë të enjten e ardhshme për diskutime të mëtejme për atë se si ta përmbyllë sezonin aktual. Ky edicioni është ndërprerë për shkak të pandemisë së koronavirusit. Ka të ngjarë që të vendoset që kampionatet të përfundojnë më herët, por vetëm me miratimin e UEFA-s, raporton rrjeti prestigjioz britanik, BBC.
Madje, në organizmin që qeveris futbollin evropian ende këmbëngulin që të luhet i gjithë edicioni deri në fund të muajit gusht. Madje plani i UEFA-s është që të gjitha ndeshjet e mbetura të luhen. “Kjo do të nënkuptonte që finalja e Ligës së Kampioneve të luhet më 29 gusht 2020 në Stamboll të Turqisë, ndërsa finalja e Ligës së Evropës në Gdanjsk të Polonisë, tri ditë më herët”, – ka sqaruar BBC-ja. Liga e Kampioneve ka për të luajtur edhe ndeshjet e kthimit të 4 çifteve të fundit të turit të 16-shes, ndërsa Liga e Evropës të gjitha ndeshjet e kthimit të turit të 16-shes.
