ASNN – Vladimir Putin ka dekoruar presidentin e FIFA-s, Xhani Infantino me “Urdhërin e Miqësisë”. Presidenti rus e ka vlerësuar numrin 1 të organizimit që qeveris futbollin botëror për mundësinë që i dha vendit të tij në organizimin e Kampionatit Botëror në 2018-ën.
“Doja t’ju falënderoja, i dashur president, dhe gjithë popullin e Rusisë, – tha presidenti i FIFA-s, gjatë ceremonisë. – Ju përgëzoj për pritjen dhe organizimin e Kampionatit Botëror më të mirë të zhvilluar ndonjëherë. Ju e mirëpritët botën si miq dhe bota ka krijuar lidhje miqësie me Rusinë që do të zgjasin përgjithmonë.”
“Është një nder dhe emocion i pabesueshëm për mua që sot të jem këtu me ju për të marrë këtë çmim të jashtëzakonshëm prestigjioz”, – shtoi Infantino. Në ceremoninë e organizuar në Kremlin, të transmetuar edhe në televizion, Putin falënderoi “të gjithë ata që ndihmuan në realizimin e kësaj ëndrre”, duke përfshirë edhe kreun e organizmit global të drejtimit të futbollit.
