ASNN – Futbollisti i talentuar brazilian, Paketa, brenda pak javësh do të jetë pjesë e Milanit. Për këtë nuk ka më dilema dhe kanë qenë funksionarët e klubit të Flamengos, që e kanë në pronësi lojtarin, ata që kanë zbuluar sekretin.

Në fakt, nuk ka shumë sekret në këtë çështje, pasi prej disa ditësh mediat italiane i bëjnë jehonë arritjes së një marrëveshjeje paraprake të futbollistit me klubin italian, por në lojë orët e fundit ishin futur edhe klube të tjera të mëdha europiane.

“I kemi ofruar atij rinovimin, por dëshira e tij e  madhe është që të luajë në Evropë, madje dhe në Ligën e Kampioneve, për t’u bërë një lojtar i madh”, – është shprehur presidenti i skuadrës së Flamengos, Eduardo Bandeira de Melo.

Ai ka folur qartë për të ardhmen e futbollistit, duke mos lënë dyshime për destinacionin e tij të ardhshëm: “Ai do të luajë në Milano në të ardhmen”. Paketa cilësohet si një prej lojtarëve më të talentuar të viteve të fundit.

Dhe tek Milani ai mund të ndjekë gjurmët e Kakasë, Ronaldinjos, Patos, Robinjos dhe talenteve të tjera braziliane që kanë luajtur me kuqezinjtë italianë.