ASNN – 23 korriku është një datë e rëndësishme për futbollin mbarëkombëtar duke parë që shënon ditën e lindjes së legjendës Fadil Vokrri. Me rastin e 62-vjetorit të lindjes së ish-Presidentit të Federatës së Futbollit të Kosovës (FFK), Presidentët Duka dhe Ademi, të shoqëruar nga drejtues të lartë të FFK-s dhe miq të Vokrrit, kanë zhvilluar homazhe te busti përpara stadiumit të Prishtinës, që mban pikërisht emrin e tij. Në nderim të kontributit të Fadil Vokrrit mbrëmjen e sotme do të zhvillohet dhe një ndeshje miqësore ndërmjet veteranëve të Kosovës dhe Shqipërisë.
Pas homazheve të zhvilluara ditën e sotme, Presidenti i Federatës Shqiptare të Futbollit (FSHF), Armand Duka, u shpreh se kontributi i Vokrrit në mendjen e çdo shqiptari është i paharruar. “Kjo datë ka sjellë në jetë një nga legjendat e futbollit dhe ish-presidentin e FFK-së, Fadil Vokrri, – ka thënë ai. – Do të kishim shumë dëshirë që të jetonte më gjatë, por me atë çfarë ka bërë gjatë gjithë jetës së tij dhe kontributin e dhënë për futbollin, ai, nuk do të vdesë kurrë. Nuk do të vdesë jo vetëm në kujtesën e komunitetit tonë të futbollit, por edhe në kujtesën e çdo shqiptari.”
“Si një njëri që ka kontribuuar në futboll, si një familjar i mirë por edhe në të gjitha këndvështrimet e tij”, – shtoi Duka. Kurse Presidenti i FFK-së, Agim Ademi, nënvizoi në fjalën e tij kontributin që Fadil Vokrri ka dhënë për futbollin e Kosovës. “Kur e njeh Fadilin jo vetëm si legjendë, por edhe si bashkëpunëtor e si mik, atëherë emocionet janë edhe më të mëdha, – ka thënë ai. – Gjithmonë do ta kujtojmë në këtë datë në mënyrën tonë të futbollit. Fadil Vokrri ishte “mbret” i fushës së blertë dhe jam shumë i lumtur që kam qenë bashkëpunëtor i tij për shumë kohë.”
“Sot, kjo datë është emocionuese normalisht edhe për familjarët, për kolegët e tij të karrierës, për bashkëpunëtorët e tij në FFK dhe për tifozët e futbollit, të cilët deri më sot nuk mund ta zëvendësojnë Fadil Vokrrin, sepse ai i kishte gjërat e veçanta e që janë të paarritshme, pavarësisht se edhe tani kemi futbollistë të jashtëzakonshëm. Sot, Fadili do t’i bënte 62 vjet. Ai jetoj pak por veprat e tij flasin sikur të jetonte 200 vjet. Prandaj, me veprat e tij, ai, gjithmonë do të jetë i pranishëm dhe nuk do të harrohet nga të gjithë shqiptarët”, – përfundoi Ademi fjalën e tij.
