ASNN – Premier Liga Angleze është padyshim një nga 5 kampionatet kryesore të vende të Evropës dhe fati i rikthimit të saj në fushën e blertë, apo edhe, si fillim, vetëm stërvitjeve është lidhur ngushtë me fatin e rikthimit të Serisë A të Italisë, Ligës spanjolle, Bundesligës gjermane apo edhe Ligës 1 të Francës. Kështu, sikundër raporton e përditshmja më e madhe britanike, “The Sun”, klubet e Premier Ligës po planifikojnë t’u kthehen stërvitjeve më 9 maj.
Kryetrajnerët e klubeve kanë qenë në kontakt me lojtarët e tyre, duke i informuar ata me planin e ri. Edie Houi ka kontaktuar lojtarët e Bornemuthit, duke i paralajmëruar ata se kur duhet të kthehen në stërvitje. Shefilld Junajtid kishte planifikuar fillimisht të kthehej në stërvitje më 4 maj, por tanimë e ka shtyrë atë me 5 ditë, për të rinisur stërvitjen më 9 maj. Edhe Bërnli i Shon Dajksit po planifikuar gjithashtu t’u kthehet stërvitjeve në të njëjtën kohë.
Po kështu po planifikon edhe Uest Hemi, por edhe Kristal Palesi. Premier Liga është pezulluar me afat të pacaktuar, për shkaku të epidemisë së koronavirusit. Krerët e ligës kanë thënë se ndeshjet do të rinisin kur të jetë sigurt. Hëpërhë, nëpër Britaninë e Madhe janë vendosur masat kufizuese dhe ato do të rishikohen më 7 maj. Por, Premier Liga po planifikon të rikthehet nëpër stadiume pa shikues në qershor. “Lojtarëve është duke iu thënë të bëhen gati që në mesin e qershorit të vazhdojnë ndeshjet, – ka thënë një burim për “The Sun”. – E po ashtu të synohet fillimi i stërvitjeve në mesin e majit.”
Premier Liga po planifikon të luhet pa shikues, ndërsa stadiumi “Uembli” mund të përdoret për të organizuar deri në 4 ndeshje brenda ditës. Po ashtu është duke u biseduar që ndeshjet të transmetohen drejtpërdrejtë edhe në kanalet pa pagesë si BBC e ITV. Krerët e klubeve të Premier Ligës kanë biseduar nëpërmjet një video-konference më 17 prill, ndërsa është thënë se në skenarin më të mirë të mundshëm, ndeshja e parë do të luhet më 8 qershor 2020.
