ASNN – Na ndajnë vetëm pak ditë nga fillimi i ri i sezonit të Premier Ligës, por edhe më pak ditë deri në mbylljen e afatit të transferimeve të futbollistëve në Angli dhe janë prapë klubet angleze që kanë shpenzuar më shumë se klubet tjera evropiane. Klubeve të Premier Ligës nuk do t’u lejohet të nënshkruajnë lojtarë kur fillon sezoni, edhe pse ata mund të shesin lojtarë jashtë apo t’i dërgojnë huazim gjatë gjithë gushtit. Për të 5-tën verë me radhë, klubet kryesore angleze kanë shpenzuar më shumë se 1 miliard euro.
Apo më saktë, 1.101 miliard euro të shpenzuara, me Liverpulin që kryeson listën si shpenzuesi më i madh. Zakonisht në këtë listë kemi lojtarë të shtrenjtë, por më i shtrenjti është portieri Alison Beker, i cili i kushtoi Liverpulit 75 milionë euro për të ardhur në “Enfilld”, ndërsa Nabi Keita që po ashtu shkoi tek ky klub për 60 milionë euro.
Rijah Mahrez është lojtari i dytë më i shtrenjtë sivjet në Premier Ligë pasi u transferua tek Mançester Siti për 68 milionë euro. Ai lë pas ardhjen e Fredit tek rivalja Mançester Junajtid.
Pesëshja e të parëve përmbyllet me Çellsin që bleu Zhorzhinjon për më shumë se 55 milionë euro. Një shumë e përgjithshme prej 195 milionë eurosh e bën Liverpulin të jetë i pari, por e papritura është Uest Hemi, që mban vendin e dytë, më 95 milionë euro të shpenzuara. Një klub tjetër që ka çuditur është Fulhami, që po gjithashtu ka shpenzuar shumë, duke qenë në treshen e të parëve, më 82 milionë euro. Nuk është ndonjë çudi që të shohim klubet e Premier Ligës që shpenzojnë kaq shumë para gjatë verës, edhe pse Seria A këtë radhë është e dyta.
Deri me tani ekipet italiane kanë shpenzuar në total 927 milionë euro, por edhe kanë marrë në gjirin e tyre lojtarin më të mirë në botë, Kristiano Ronaldon. La Liga spanjolle është e treta, më 643 euro të shpenzuara deri me tani, Bundesliga gjermane e katërta më 415 milionë, para Ligës 1 të Francës, që ka shpenzuar 376 milionë, kurse interesant është fakti se “Çampionshipi”, kategoria e dytë e futbollit anglez ka shpenzuar 148 milionë euro.
