ASNN – Ashtu si kampionati simotër në Gadishullin Iberik, Primera Liga e Spanjës, edhe Primeira Liga e Portugalisë premton të ofrojë festë të futbollit veror kur të rifillojë pas ndërprerjes për shkak të pandemisë së koronavirusit. Kjo sepse ndeshje do të luhen thuajse çdo ditë, bazuar në kalendarin e shpallur të shtunën.
Tanimë është zyrtare dhe niveli më i lartë i Kampionatit Portugez të Futbollit do të rifillojë më 3 qershor, me ndeshjen midis Portimonenses dhe Zhil Visentes dhe atë të Famalicaos ndaj Portos kryesuese. Këto ndeshje janë të vlefshme për turin e 25-të, që do të zhvillohet përgjatë 4 ditëve.
Pas një dite pushim, ndeshjet e javës tjetër, asaj të 26-të, do të zhvillohen përgjatë 5 ditëve në vijim. Edhe javët e tjera do të luhen përgjatë 4 deri 6 ditëve, ndërsa midis çdo jave të kampionatit do të ketë vetëm nga një ditë pushim. Kështu kampionati do të zhvillohet deri më 21 korrik 2020.
Shumica e ndeshjeve do të zhvillohen duke nisur nga ora 19:00 dhe nga ora 21:15, ndërsa disa prej ndeshjeve do të luhen duke nisur prej orës 17:00. Ndërkohë kampionati i Republikës Çeke ka rifilluar të shtunën (sonte), me ndeshjen midis Teplicës dhe Slovan Liberecit.
