ASNN – Dinamo ka siguruar një 3-pikësh të vlefshëm në javën e 15-të të Kategorisë së Parë të Kampionatit Kombëtar të Futbollit. Blutë e kryeqytetit kanë mundur në fushën e vështirë të Fierit, Apoloninë me rezultatin 1-3. Kjo sfidë u transmetua drejtpërdrejt nga Rrjeti i Radio-Televizioni Shqiptar. Kështu, Dinamo ka mundur 1-3 Apoloninë në fushën e kësaj të fundit duke marrë kështu një fitore të vyer.
Ndeshja ka nisur më mirë për vendasit, që rrezikojnë që në minutën e 4-t, kur Shahaj tenton me një goditje fluturimthi me të djathtën nga jashtë zone por topi kalon mbi traversë. Më pas, në të 13-ën, është Dimo që brenda zonës gjuan fort por pret Birja. Apolonia ka inisiativën dhe vazhdon të rrezikojë portën e Dinamos. Në minutën e 33-të, Myrto Uzuni nuk arrin të kontrollojë një top të ardhur nga Krasniqi kur ishte brenda zonës.
4 minuta më pas është Krasniqi, që i vetëm para portierit Birja godet në mënyrë të gabuar. Me një Apoloni më kërkuese në drejtim të golit, por me rrjeta të paprekura mbyllen 45 minutat e para. Pjesa e dytë nis me gol. Eshtë Dianmo që kalon në epërsi, kur Ejo driblon bukur brenda zonës së Apolonisë, duke mposhtur portierin Çako. Por vjen minuta e 66-të dhe barazon Apolonia.
Krasniqi ekzekuton bukur një goditje dënimi dhe topi përfundon në rrjetë. Në të 73-ën vendasin mbesin me 10 lojtarë në fushë. Një goditje me bërryl në minutën e 79-të e portierit Çako ndaj futbollistit të Dinamos, bën që të ndërhyjë gjyqtari kryesor i takimit. Karton i kuq për veprimin e Çakos dhe 11-metërsh për Dinamon. Nga pika e bardhë gjuan Gërxho dhe 1-2 për Dinamon.
Në këto momente të mira për miqtë, vjen edhe goli i tretë. Në minutën e 83-të është Enkel Alikaj që godet saktë nga jashtë zone, duke fiksuar shifrat në 1-3 për Dinamon.
