ASNN – Instituti i Historisë dhe i Statistikave në Futboll (IFFHS), jep çdo vit çmimin për portierin më të mirë në botë, një vlerësim që ka marrë jetë që nga viti 1987, pra rreth 32 vjet më parë. Është stafi redaksional i këtij institucioni dhe njëherësh ekspertët nga të gjitha kontinentet që japin vlerësimin e tyre për lojtarin e fundit më të mirë në botë. Këtë çmim, vitet e fundit, e kanë fituar më shumë 3 portierë: Iker Kasijas, Xhixhi Bufon dhe Manuel Nojer, që të tre aktivë në fushat e lojës.

E vërteta është se, portieri spanjoll Iker Kasijas, së bashku me Xhixhi Bufonin, e kanë fituar nga 5 herë secili çmimin e portierit më të mirë në botë dhe këta të dy janë më të kuotuarit. Në një mbrëmje gala të futbollit botëror, çdo muaj janar jepet trofeu për portierin më të mirë, dhe e veçanta e portierit të famshëm spanjoll është se e ka fituar 5 herë radhazi këtë çmim, midis vitit 2008-2012. Ka dhe një statistikë tjetër që duhet përmendur.

Bajerni i Mynihut është skuadra që ka nxjerrë më shumë portierë që kanë fituar statusin e më të mirit në botë, plot 8 herë. Ka pasur edhe sondazhe me votë për portierin më të mirë të historisë. Natyrisht, krahasimet për periudha të ndryshme nuk janë domethënëse për cilësinë, por janë domethënëse për imazhin. Dhe me të vërtetë, lojtari që është vlerësuar si portieri i shekullit është një komunist, ose më saktë një lojtar që vjen nga Bashkimi Sovjetik.

I famshmi dhe i papërsëritshmi Lev Jashin, i cili ka pasur nofka nga më të pabesueshmet për spektaklin që dhuronte, sidomos për pritjet e tij të shkallës më të vështirë. Janë të rrallë portierët që kanë pasur cilësitë e tij, sidomos për kontrollin e gjithë zonës së portierit dhe njëherësh për akrobacitë e tij të çuditshme në pritjet e topave që vinin nga sulmuesit kundërshtarë. Popullariteti i tij ka qenë mjaft i madh dhe FIFA e ka vlerësuar atë si portierin më të madh të shekullit.

Në vitin 1963, Lev Jashin mori “Topin e Artë dhe është i pari dhe i vetmi portier që ka marrë ndonjëherë këtë trofe. Për shumë njerëz në Evropën Lindore, nuk do të ketë më një portier të dytë në histori si Lev Jashini i Bashkimit Sovjetik. Megjithatë, edhe ai, njësoj sikurse Pele e lojtarët e tjerë të mëdhenj të asaj kohe si Pushkash, Di Stefano e të tjerë, i përkasin një epoke tjetër. Futbolli evoluon, ka përmirësim e perfeksionim dhe e njëjta gjë mund të thuhet edhe për portierët.

10 portierët më të mirë të shekullit XX

Nr.       Portieri                       Shteti                                        Periudha     Votat

1. Lev Jashin                Bashkimi Sovjetik                1950-1970     1002
2. Gordon Banks          Angli                                       1963-1972       717
3. Dino Zof                    Italia                                        1968-1983       661
4. Sep Majer                  Gjermania Perëndimore     1966-1979       456
5. Rikardo Zamora       Spanja                                   1920-1936       443
6. Hozé Luis Çilavert   Paraguaji                               1989-2003       373
7. Piter Shmajkël          Denmark                                1987-2001       291
8. Piter Shilton              Angli                                       1970-1990       196
9. Frantishek Planiçka            Çekosllovakia                       1926-1938       194
10. Amadeo Karrizo Argjentina                             1954-1964       192

10 portierët më të mirë të shekullit XXI

Nr.       Portieri                                   Shteti                          Votat  

1. Xhanluixhi Bufon                Itali                              199
2. Iker Kasijas                            Spanjë                       197
3. Peter Çeh                              Republika Çeke       154
4. Edvin van der Sar                Holandë                     116
5. Oliver Kahn                           Gjermani                      99
6. Dida                                        Brazil                            90
7. Viktor Valdez                                    Spanjë                         82
8. Hulio Sezar                           Brazil                            76
9. Jens Lehman                       Gjermani                      72
10. Roberto Abondanzieri Argentina                    68