ASNN – Dje pasdite ka përfunduar në qytetin e Burrelit, Turneu Ndërkombëtar i Pingpongut BITT 2016 “Tribut për Matin”. 100 sportistë nga gjashtë vende rivalizuan mes tyre për t’u shpallur fitues në kategori të ndryshme. Falë përkushtimit dhe bujarisë së drejtoreshës së kësaj veprimtarie të përvitshme në Burrel, Elda Gjoka, u luajtën me shumë se 230 ndeshje. Ndërkohë që sportistë nga Serbia, Maqedonia, Bosnja, Mali i Zi dhe rrethe të ndryshme të vendit tonë u njohën më afër me traditat, vlerat dhe mikpritjen matjane.
Në mbyllje të veprimtarisë në Pallatin e Sportit “Ferit Hysa” u organizua ceremonia e ndarjes së çmimeve dhe kupave të BITT-it. Esmeralda Hoxha, koordinatore e veprimtarisë, falënderoi partnerët që mundësuan realizimin e këtij turneu. Mes tyre ajo veçoi gazetën “Sport Ekspres” duke falënderuar drejtuesit dhe stafin e saj që e mbështetën BITT-in 2016. Folën pastaj me radhë drejtues të Federatës së Pingpongut, të Bashkisë Mat, të shoqatës së personave me aftësi ndryshe, etj.
Tonin Binoshaj, Sekretari i Përgjithshëm i Federatës Shqiptare të Pingpongut, theksoi se duhen falënderuar të gjithë sportistët për shpirtin e garës që treguan në ndeshjet e luajtura. Përfaqësuesi i Bashkisë Mat, Kasem Kola, nënvizoi se një falënderim i veçantë shkon për drejtuesen e BITT-it, Elda Gjoka. Ai u uroi sportistëve pjesëmarrës mirëseardhjen në të tjera veprimtari të tilla sportive, që do të zhvillohen në qytetin e Burrelit.
Bledar Suxha, kryetari i shoqatës së personave me aftësi të kufizuar, theksoi ndryshe nga herët e tjera disa ndeshje u gjykuan nga kolegët dhe koleget e tij. Suxha vlerësoi personat me aftësi të kufizuara nga Kosova e Maqedonia, që ishin pjesëmarrës në BITT 2016.
