ASNN – Përgatitjet për BITT 2016 “Tribut për Matin” janë drejt përfundimit. Zyra e informacionit të kësaj veprimtarie konfirmon se pjesëmarrës do të jenë 90 sportistë nga 5 shtete. Kanë konfirmuar pjesëmarrjen e tyre Maqedonia, Serbia, Kosova, Bosnje-Hercegovina, Mali i Zi dhe Shqipëria. Për herë të katërt, qyteti i Burrelit bëhet qendra e sportit të pingpongut.
Mati po ia del të listojë një veprimtari dinjitoze, mbresëlënëse dhe të bukur. Ajo që e bën të sigurt suksesin është mbështetja serioze dhe e pakursyer e partnerëve prestigjioz. Nesër në sheshin “Demokracia” të Burrelit pritet të mbërrijnë çiklistët që paralajmërojnë çeljen e BITT-it 2016.
Presidenti i Federatës Shqiptare të Çiklizmit, Skënder Anxhaku, vazhdon të tregojë dëshirën dhe angazhimin e tij për të organizuar etapën çiklistike Tiranë-Burrel, 90 kilometra të gjatë. Anxhaku ka ditur të bashkëpunojë mjaft mirë me drejtuesit e BITT-it, zyrtarët e Bashkisë Mat dhe faktorë të tjerë.
“BITT 2016, me gjithë angazhimin serioz dhe me përgatitjet maksimale të kolegëve organizatorë të grupit të punës së Bashkisë Mat po ia del të sjellë një tjetër ngjarje sportive në qytetin verilindor”, – shprehen organizatorët. Ato falënderojnë mbështetësit matjanë Ilir Neziri, Qamil Aliaj dhe Luan Stafasani.
Është menduar po ashtu për sigurinë e veprimtarisë, akomodimin e sportistëve dhe mysafirëve të tjerë. Prej katër vitesh pranë organizatorëve dhe lojtarëve të BITT-it qëndron i palodhur dhe korrekt Gëzim Vuka, drejtuesi i Pallatit të Sportit “Ferit Hysa” të Burrelit.
“Kemi pasur mbështetjen e pakursyer të Vukës. Katër vjet më parë ai së bashku me organizatorët e BITT-it ndihmoi për ndryshimin e gjendjen në Pallatin e Sportit Burrel. U siguruar për herë të parë ndriçimi, pajisjet hidrosanitare, ndenjëset e dëmtuara”, – thanë burime pranë zyrës së informacionit të BITT-it.
