“BITT 2015”, ose quajtur ndryshe “tribut miqësie”, dje ka shpallur projektin e tij në Pallatin e Sportit “Ferit Hysa” në Burrel. Gjithçka ka ndodhur në një konferencë për shtyp, atje ku kanë qenë të pranishëm Elda Gjoka (drejtoresha e përgjithshme e kompanisë “Genuine Effect”), Adelina Farrici (Kryetarja e Bashkisë Burrel), Tonin Binoshi (Sekretari i Përgjithshëm i Federatës Shqiptare të Pingpongut), Lefter Salaj (përfaqësuesi i drejtorisë arsimore Burrel), Agron Malaj (përfaqësuesi i “Global Security) dhe Qamil Alia (Kryetari i shoqatës QDMD Mat dhe pronari i hotel turizmit “Mati”).

Konferenca u hap nga Elda Gjoka, e cila shpalli datat e zhvillimit të kësaj veprimtarie, e cili do të mbahet nga data 1, deri më 3 maj 2015. Kryebashkiakja Farrici theksoi që ekziston ambicia për rritjen e cilësisë dhe sasisë në sporte. Kur u zhvillua për herë të parë, kjo veprimtari iu kushtua pasionit për sportin, ndërsa këtë vit ka në qendër mësuesit. Ajo e paralelizoi këtë duke përmendur edhe festën e mësuesve, e cila është pas disa ditësh. Ndër të tjera qytetarja e parë e Burrelit, Farrici, falënderoi “Genuine Effect” që i besoi Burrelit organizimin e këtij aktiviteti për të tretin vit radhazi.

Qamil Aliaj, një ndër partneret që nga lindja e BITT, u shpreh se: “Duke parë vlerat e këtij sporti jemi përpjekur të japim kontributet tona. Aktivitete të tilla i japin edhe gjallëri qytetit”. Sekretari i Përgjithshëm i Federatës Shqiptare të Pingpongut, Tonin Binoshi, shpjegoi që dhe këtë vit BITT do të shkojë shumë mirë duke parë edhe suksesin e organizatores Elda Gjoka. Më pas përfaqësuesi i drejtorisë arsimore në Burrel, Salaj ka shpjeguar se: “Janë mësuesit ata që na formuan dhe ndikuan që ne të jemi këtu ku jemi sot. Prandaj ky aktivitet, përpos të tjerëve, ju dedikohet trajnerëve”.

Salaj theksoi që ky aktivitet po kthehej në traditë e cila shpresohet të jetë afatgjatë. “Fakti që festa e mësuesit është afër shpresohet të jetë një ogur i mirë.”