ASNN – Vehap Xhindoli “qytetar Nderi” i Lushnjës, peshëngritja në Lushnjë kërkon rrugë suksesi. Bashkia e Lushnjës i dha titullin “Qytetar Nderi” ish-shtangistit Vehap Xhindoli. Figurën e Xhindolit e vlerësoi lart trajneri i njohur i peshëngritjes shqiptare, Leonard Toska, i cili ktheu në vëmendje punën e madhe të të lushnjarit si sportist e tani së fundmi si zyrtar.
Toska kujtoi gjithashtu se duhet të mbështetet peshëngritja nga qeveria lokale e në këtë rast apeloi tek Bashkia e Lushnjës që të investonte për peshëngritjen. Nënkryetari i Bashkisë, Gentian Nushi, premtoi se administrate lokale në Lushnjë do të bënte çmos që të rriste investime për ekipin e shtangës, ndërsa përmendi Xhindolin si një figurë të sportit të peshëngritjes në Lushnjë, një shembull që duhet ndjekur nga të rinjtë.
Vehap Xhindoli ka qenë sportist “kampion” për shumë vite gjatë rinisë së tij ku ka përfaqësuar me dinjitet Lushnjën në veprimtaritë kombëtare. Më herët, në fund të muajit dhjetor 2018, Federata Shqiptare e Peshëngritjes në bashkëpunim me strukturat lokale në Elbasan, nderuan me çmime nderi ish-shtangistë të shquar të këtij qyteti. Qëllimi është të dalin në pah vlerat e këtij sporti ndër breza dhe të rinjtë të kenë simbol përkushtimi në rrugëtimin e tyre.
