ASNN – Federata Shqiptare e Peshëngritjes do të organizojë Kampionatin Evropian të Të Rinjve dhe Nën-23-vjeçarëve në vitin 2017. Ka qenë Presidenti i Federatës Evropiane të këtij sporti, Antonio Urso ai që ka deklaruar se “ky eveniment i është besuar Shqipërisë, pasi ka dhënë prova që di të organizojë veprimtari të tilla në mënyrë të shkëlqyer”.
Kështu, Shqipëria do të organizojë një tjetër veprimtari madhore ndërkombëtare në sportin e peshëngritjes. Bëhet fjalë për Kampionatin Evropian të Peshëngritjes për Të Rinj dhe Nën-23-vjeçarët në vitin 2017. Lajmin e ka bërë të ditur Presidenti i Federatës Evropiane të Peshëngritjes (EWF), Antonio Urso, gjatë vizitës së tij të radhës në kryeqytetin shqiptar.
“Është hera e disatë që vij në Shqipëri, por këtë herë dua të jap lajmin e gëzuar se këtu do të organizohet Kampionatin Evropian të Peshëngritjes për Të Rinj dhe Nën-23-vjeçarët në vitin 2017, – tha ai gjë konferencës për shtyp të mbajtur në mjediset e Akademisë së Shkencave. – Shqipëria ka dhënë prova se di të organizojë në mënyrë të shkëlqyer veprimtari të përmasave të tilla ndërkombëtare.”
“Për organizimin e Evropianit të Të Rriturve në 2013, Federata Evropiane e peshëngritjes, në unanimitet të të gjithë anëtarëve të saj, ka vendosur t’i japë medaljen e artë Federatës Shqiptare të Peshëngritjes (FSHP), – ka vijuar kreu i organizmit që qeveris shtangën kontinentale. – Në Kampionatin Evropian të Peshëngritjes për Të Rinj dhe Nën-23-vjeçarët në vitin 2017 do të vijnë rreth 600 pjesëmarrës nga 49-50 vende të kontinentit, të cilët do të qëndrojnë një javë.”
“Gjatë këtij viti Federata Evropiane e Peshëngritjes do të organizojë edhe një seminar 3-ditor me trajnerë të huaj këtu në Shqipëri”, – ka shtuar Urso. Përsa i përket kushteve të Pallatit të Sportit “Asllan Rusi” ku do të zhvillohet ky Evropian, Presidenti i FSHP-së, Elez Gjoza ka dhënë edhe sqarimet për mediat. Të pranishëm në veprimtari ishin edhe Presidenti i KOKSH-it, Viron Bezhani, dhe Sekretari i Përgjithshëm, Stavri Bello, trajnerë dhe sportistë të shtangës.
