Daniel Godelli ka plasur një tjetër bombë që lidhet me çështjen e dopingut në Botërorine Kazakistanit më 2014-ën. Është rasti që ai doli “kampion bote” dhe më pas u dogj prej kësaj gjëje, ndaj me zë dhe figurë për “Top Channel” e ka thënë troç: Drogën ma dha Luan Shabani. “Federata Shqiptare e Peshëngritjes na ka thënë që pini çdo gjë që ju jep Shabani. Neve ushqimi na vinte nëpër dhoma dhe shpërndahej me emra”, – ka thënë Daniel Godelli, që prej pak ditësh ka mundur të çlirohet nga dënimi 2-vjeçar që mori pasi rezultoi pozitiv në Botërorin e vitit 2014, kur u shpall “kampion bote”.
Arritja më e madhe sportive ndonjëherë në vendin tonë u shndërrua në turp dhe heroi Godelli humbi nga qarkullimi, pa mundur të shprehet dhe pa ditur të vërtetën, as nga trajneri që i stërviti në ato kohë, Luan Shabani dhe as nga federata, që kishte dalë garant për nivelin dhe pastërtinë e trajtimit të peshëngritësve shqiptarë. “Si në çdo sport force, edhe ne marrim proteina dhe kreatinë, – tregon Godelli. – Ne pimë çdo gjë që na dha Luan Shabani, pa ditur se çfarë kishte brenda. Në momentin që u kapa, unë Luanin e kam sharë dhe nuk kam kontaktuar më me të.”
Premtimet për të qenë Botërori më i suksesshëm i Shqipërisë u kthyen në Botërorin më të turpshëm, me 3 sportistë pozitivë, mes tyre edhe kampioni i botës, Daniel Godelli. “Ishim 3 sportistë që u kapëm me të njëjtën substancë dhe kjo më bën që të dyshoj se ka qenë një dorë e ligë”, – përfundon Godelli. Prej gati dy vitesh, aq sa ishte pezullimi i 25-vjeçarit Godelli, “kampioni i botës” për 20-vjeçarët dhe rekordmen e fitues i shumë medaljeve, vazhdon stërvitjen me të njëjtat ritme, për të ngritur sërish lart emrin e tij si sportist, bashkë me flamurin.