Shqipëria e peshëngritjes ka mirëpritur presidentin e Federatës Evropiane, Antonio Urso, i cili pas zgjedhjes vizitën e parë si titullar i shtangës kontinentale e ka bërë në Tiranë. Dhe ka pasur një objektiv madhor, sepse Shqipëria do të jetë organizatorja e Kampionatit Evropian për Të Rinj dhe Nën-23-vjeçarët më 2017 në Tiranë.

E parë kështu, por dhe për shkak të problemeve që ka kaluar me dopingun, ardhja e Ursos me projekte që lidhen në ndihmën për trajnerët e gjyqtarët, apo dhe në bazë materiale, është parë si një rimëkëmbje. Së pari imazhi, por dhe mbi të gjitha për ngritjen e kokës lart të peshëngritjes shqiptare, e cila pretendon të kthehet tashmë e pastër dhe e fortë e me medalje në veprimtaritë ndërkombëtare.

Është zgjedhur Akademia e Shkencave, sepse Antonio Urso është “doktor profesor” në shkencat sportive. Dhe e gjithë kjo atmosferë, atje ku nuk ka munguar drejtori i sporteve në Ministrinë e Arsimit dhe Sportit, Vladimir Gjonaj, drejtori i Agjencisë së Shërbimit të Sporteve, Bledar Doçi, presidenti i Komitetit Olimpik Kombëtar Shqiptar, Viron Bezhani, dhe Sekretari i Përgjithshëm, Stavri Bello, e ka mrekulluar Urson.

Madje e ka mrekulluar më së shumti dhe takimi me kryetarin e Akademisë së Shkencave, Myzafer Korkuti. Ndaj dje Urso është pritur si tjetërkush, kurse peshëngritja shqiptare e ka marrë notën “10” të mikpritjes për ndërkombëtar, një bonus shumë i madh…