Gazeta “Sport Ekspres” menjëherë pas akuzave që Ilir Suli ka hedhur ndaj marrëveshjes mes Erkand Qerimajt dhe presidentit të Federatës Shqiptare të Peshëngritjes, Elez Gjoza, ka kontaktuar me shtangistin shkodran. “E para, – thotë Qerimaj, – Elez Gjoza është presidenti i Federatës Shqiptare të Peshëngritjes dhe si i tillë respektohet institucioni.”
“Unë nuk dua të merrem me Ilir Sulin, por për mundin dhe djersën time nuk i marr leje askujt, pasi bëhet fjalë për mungesën e trajtimeve ushqimore në 5 muaj dhe gjëra të tjera, – ka vijuar ai. – Ashtu sikurse Suli nuk më ka marrë leje mua kur ka marrë milionat nga ish-presidenti i Federatës Shqiptare të Peshëngritjes, Esat Ademi, apo dhe nga kryeministri i asaj kohe, Fatos Nano.”
“Nuk bëhet fjalë për tradhti, sepse ato që kam pasur për t’i thënë i kam thënë, – ka këmbëngulur shtangisti shkodan. – Dhe të tjerët të mos fshihen pas meje, le të dalin të flasin, sepse tanimë nuk ka nevojë për të më futur mua në sherr me Elez Gjozën. Nëse do të vazhdojnë të shpifin sigurisht që ka dhe kundërvajtje penale që janë të parashikuara në Kodin Penal.”
“E mirë bëjnë, sepse fitoj ca lekë të tjera. Nuk është faji jonë që Suli milionat fitoi nuk i ka më dhe është katandisur në atë gjendje. E mira është të përqendrohemi tek aktiviteti dhe të bëjmë më të mirën për të ngritur lart flamurin. E theksoj dhe një herë tjetër për mundin e djersën time që më takon nuk i marr leje askujt për ta kërkuar dhe për ta marrë”, – ka përfunduar peshëngritësi Erkand Qerimaj.