Pas ankesës së Kristi Ramadanit dhe Sopot Sulës, që janë lënë jashtë Evropianit së të rinjve dhe moshave për hakmarrje, Sport Ekspres ka kontaktuar me presidentin aktual të Federatës Shqiptare të Peshëngritjes, Elez Gjoza. Sipas tij, Federata Shqiptare e Peshëngritjes nuk ka luksin që të çojë dëm paratë e taksapaguesve shqiptarë. “Së pari, – thotë Gjoza, – në bazë të llogaritjeve të rezultateve që të dy këta shtangistë kanë arritur para 24 ditësh në Turneun Memorial “Mirjan Hakani”, atëherë kemi një vend të 16-të për Kristi Ramadanin dhe një vend të 17-të për Sopot Sulën.”
“Në këto kushte, kur ne jemi sporti që jemi renditur në vendin e 5-të në Lojërat Olimpike “Rio de Zhaneiro 2016”, s’kemi luksin të çojmë dëm paratë e taksapaguesve shqiptar, – ka vijuar ai. – Jo vetëm kaq, por nuk ka shansin të shkojë askush që nuk do të jetë në zonën e medaljeve. Sepse, si Alban Hoxha, ashtu dhe Emiljano Lushi janë për medalje. Por sikur njëri prej tyre me rezultatet e deklaruara të jetë në vend të 4-t nuk shkon. E para kjo. E dyta kanë një muaj që janë grumbulluar tek “Tropikali”. Patën thënë se do të bënin garë kontrolli, por nuk ka ndodhur kështu.”
“Pastaj pa një test antidopingu përpara garës në kombëtaren e peshëngritjes shqiptare nuk përfshihet askush, ka këmbëngulur Gjoza. – Këto janë të vërteta. Mos harroni që ne pretendojmë të jemi medalist në Lojërat e Mesdheut, si dhe fitues me ekip dhe individë në Evropian. Sa për këshillin e trajnerëve dhe të gjyqtarëve, jo vetëm që funksionojnë dhe kanë një status të tyrin, por kanë zgjedhur që të votojë një figurë të nderuar të botës akademike dhe të peshëngritjes si Gudar Beqiraj. E në Vlorë do të votojnë vetëm trajnerë dhe inspektorë klubesh.”
“Pra thënë shkurt, pa qenë në zonën e medaljeve nuk merr pjesë asnjë në garat ndërkombëtare. Kjo është e qartë për të gjithë”, – ka përfunduar kreu i organizmit që qeveris shtangën shqiptare.
