ASNN – Peshëngritja shqiptare ka ngritur sërish lart flamurin në arenën ndërkombëtare, por, edhe pse nënkampion i Evropës, Hysen Pulaku do të ketë fatin e keq, pasi nuk do të përfitojë asnjë të ardhur nga shteti shqiptar me ligjin në fuqi.

Çuditërisht, në vendimin e parë të Këshillit të Ministrave nr. 1720, datë 29.10.2008 “Për kriteret e përcaktimit të nivelit të lartë sportiv, për mënyrën e shpërblimit të sportistëve që i arrijnë këto nivele, si dhe për përfitimin e trajtimit për përgatitjen sportive”, kategoria e Nën-23-vjeçarëve nuk është e përfshirë në shpërblimin e medalistëve në dygarësh. Në të vërtetë, në kriteret e përcaktimit të nivelit të lartë sportiv janë përfshirë vetëm të rriturit dhe kategoria e të rinjve, që sipas VKM-së shpërblehen në masën 25 për qind të vlerës së përcaktuar për të rriturit.

Pas historisë që bënë pak ditë më parë në kampionatin botëror për të rritur në Almati të Kazakistanit Daniel Godelli dhe Romela Begaj, heroi i radhës kuqezi ka qenë Hysen Pulaku.

Në kampionatin e 23-të Evropian për Nën-23-vjeçarët, që u zhvillua në Limasol të Qipros, Pulaku fitoi tri medalje: dy argjendi dhe një medalje ari. Në shkëputje, 22-vjeçari do të nderohej me vendin e dytë kontinental; kampion Evrope në stilin e shtytje dhe në dygarësh merr medaljen e argjendtë me 369 kg të ngritura në total.

Në stilin e shkëputjes Pulaku ka qenë superior në të tria provat. Në provën e tretë dhe të fundit provon me +5 kg (166 kg) dhe finalizimi ka qenë perfekt, pasi i dhuron medaljen e argjendtë. Te shtytja, Pulaku e çon peshën në 203 kg te prova e dytë, por siç duket kjo është dita e shqiptarit.

Pesha më e lehtë trupore e tij 83.100 kg ndaj sfidantit Saiakov 84.750 kg e favorizon shqiptarin të kurorëzohet kampion Evrope në stilin e shtytjes. Në përfundim të garës 85 kg, bateria A, Hysen Pulaku klasifikohet i dyti me 369 kg në dygarësh.

Shiu përmbyt Kamzën, ndërpritet ndeshja Internacional-Drini