Presidenti i Federatës Shqiptare të Peshëngritjes i kundërpërgjigjet akuzave të Erkand Qerimaj: “I vetmi që qëndroi dhjetë ditë më shumë në Amerikë, së bashku me trajnerin”.
Debatet në peshëngritjen shqiptare nuk kanë të sosur. Dje në mesditë është presidenti i Federatës Shqiptare të Peshëngritjes, Elez Gjoza, i cili i është kundërpërgjigjur akuzave të Erkand Qerimajt që lidhen me vizat amerikane në Botërorin e kaluar për të rritur. “Më duhet të them, – shpjegon i pari i peshëngritjes shqiptare, – që delegacioni shqiptar siç u nis ashtu dhe erdhi nga Shtetet e Bashkuara të Amerikës, që është i vetmi vend në të cilin duhet vizë për të shkuar.”
“I vetmi që ka qëndruar më shumë dhe jo pak, por 10 ditë, ishte Erkand Qerimaj, së bashku me trajnerin e tij, – ka vijuar ai. – Por kjo nuk ka shumë rëndësi. Çdo delegacion që merr pjesë në Botëror e ka detyrim të marrë dhe median, apo dhe fotoreporter për të pasqyruar veprimtarinë e vet. Dhe ne jemi i vetmi delegacion që nuk e bëjmë për arsye të fondeve të pakta që kemi, gjë e cila do të rikuperohet që në Kampionatin Evropian të Peshëngritjes në Split. Ne nuk merremi me shitjen e vizave. Përkundrazi i gjithë delegacioni shqiptar ka qenë vetëm me sportist.” E duke vazhduar më tej, Gjozaj tregon se çfarë ka bërë Qerimaj që nga 2015-ta.
“Në Kampionatin Evropian të Gjeorgjisë më 2015-ën u dëmtua, në Norvegji 2016-ën nuk i dha asnjë pikë delegacioni kuqezi, ndërsa kërkohej kualifikimi me normë për në Lojërat Olimpike “Rio de Zhaneiro 2016”, – ka vijuar Gjoza. – Në të vetmen veprimtari që ka konkurruar ishte në Kupën e Shqipërisë e mos harroni që është sportisti më i paguar. Po e them me forcë në 4-vjeçarin e dytë të mandatit tim do të ketë një reformë të fortë për peshëngritjen, duke menduar të ardhmen. E kam thënë dhe një herë tjetër dhe po e them përsëri; sportisti do të bëjë sportistin, trajneri, trajnerin e të gjithë detyrën e vet.”
“Nuk do të ketë më që sportistët ta bëjnë Federatën si të duan e të zgjedhin ato trajnerin. Jemi duke investuar në një brez të së ardhmes, sepse peshëngritja duhet të vazhdojë të eci përpara. Kështu që debatet do të mund të shuhen vetëm me punë dhe me reformë, e cila mund të jetë dhe me dhimbje për ndonjërin që nuk do të bëjë më sport”, – ka përfunduar Presidenti i Federatës Shqiptare të Peshëngritjes, Elez Gjozaj, duke iu kundërpërgjigjur akuzave të Erkand Qerimajt.
