Presidenti i shtangës shqiptare: “Kaluam një periudhë të vështirë pas rasteve të dopingut. Ishte shumë e lehtë për mua të jepja dorëheqjen si president, por ne besuam dhe gjetëm forca për t’u ngritur. Tashmë do ta themi fjalën në Evropian.” “Briken Calja dhe Erkand Qerimaj me vendet e tyre të 6-të dhe të 10-të në Botërorin e Hjustonit në Shtetet e Bashkuara të Amerikës janë që tani me normë kualifikimi për në Lojërat Olimpike “Rio de Zhaneiro 2016”. Kështu e ka nisur prononcimin e tij presidenti i Federatës Shqiptare të Peshëngritjes, Elez Gjoza, i cili në një rrëfim prej rreth një ore tek “TeleSport”-i ka bërë përmbledhjen e vitit për shtangën shqiptare.
Gjoza, si i pari i peshëngritjes shqiptare e ka pranuar që, pas rasteve të dopingut të ndodhura në Botërorin e Kazakistanit më 2014, atje ku Begaj, Godelli dhe Pulaku rezultuan pozitiv në analizat antidoping me të njëjtën substancë, “stanozolol”, ka qenë e vështirë. “Ishte shumë e lehtë, – ka thënë Gjoza , – edhe unë si president të jepja dorëheqjen. Gjatë vitit ne jemi ndeshur me disa dorëheqje për shkak të këtyre rasteve që nga Sekretari i Përgjithshëm Muharrem Berisha e deri tek anëtarët e kryesisë. Sepse përveç dënimit të peshëngritësve, të cilët janë ndër më të mirët e shtangës shqiptare, ne ishim të pezulluar dy vjet si peshëngritje me një gjobë prej 100.000 eurosh.”
“Një pjesë e së cilës është paguar dhe ne kemi marrë pjesë në Botëror të Hjustonit, edhe sepse Tamas Ajan, si dashamirës i peshëngritjes shqiptare, mblodhi bordin ekzekutiv përpara Botërorit dhe vendosi që vendi ynë duhet të marrë pjesë, – vijoi kreu i organizmit që qeveris peshëngritjen shqiptare. – Më duhet të falënderoj biznesin që u afrua, pa të cilin ne nuk mund ta paguanim këtë gjobë. Ama kemi treguar se me Caljen dhe Qerimajn jemi përsëri në udhë të mbarë. U rrëzuam, por u ringritëm, kur shtete të tjera si Turqia, Greqia, Bullgaria, Kazakistani dhe Azerbajxhani jo vetëm që janë dënuar, por dhe sot nuk marrin pjesë.”
Peshëngritja do të jetë përsëri sport elitar, sepse me shtangistët që ka është në gjendje të bëjë sport përsëri të pastër e po kështu të ketë medalje të pastra, – vijoi ai. – Ja pse unë nuk ika, sepse ditëm të gjithë bashkë, edhe duke i qëndruar pranë sportistëve tanë të dënuar, të cilët do të kthehen përsëri të fortë, të ngrihemi. Kjo është lufta e fituar prej nesh”. Gjoza nuk pranon të bëjë ende fajtor për rastin e përbashkët të përdorimit të stanozololit, që gjithsesi ishte i atillë për t’i vënë shkopinj nën rrota peshëngritjes shqiptare. “Do të ishte subjektive nga ana ime që të akuzoja ndonjërin. Por është normale që do të ketë analiza dhe në vijim, të cilat pak nga pak do ta zbardhin të vërtetën e asaj që ka ndodhur me shtangistët tanë në Greqi”, – përfundoi ai.
