Elez Gjoza, presidenti i Federatës Shqiptare të Peshëngritjes, ka pranuar se Erkand Qerimaj, Daniel Godelli, Romela Begaj, Briken Calja e të tjerë e bëjnë kombëtaren shqiptare të fortë në prag të Kampionatit Evropian të Peshëngritjes në Split, atje ku sipas tij Shqipëria do të renditet në vendin e parë deri në të 3-tin. “Palestrat nuk janë përgjegjësi e Federatës”, – ka deklaruar ai gjatë dy ndërhyrjeve të tij telefonike në emisionin sportiv “E Hëna Sportive” të moderatorit Eno Skarço në Rrjetin e Radio-Televizionit Shqiptar.
“E megjithatë së bashku me Drejtorin e Sportit kemi vendosur që të shkojmë në Bashkinë e Shkodrës për të biseduar për rregullimin e këtij probleme, – ka vijuar Gjoza. – Kemi pajisur me boshte e pedana të gjithë. Dhe më duhet të them se jemi Federata sot që nuk kemi më asnjë borxh ndaj ndërkombëtarët. Unë nuk dyshoj tek raportet mjekësore, përkundrazi jam në krah të sportistit, të cilit dhe në Kampionatin Kombëtar të mbajtur në Durrës, i kam thënë që “vazhdo e puno fort se duhet të marrim medalje në Split!”.”
“Thirrja ime; hajde të sheshojmë të mosmarrëveshjet, të marrësh atë që të takon dhe më pas të vazhdojmë punën të gjithë së bashku në harmoni për më shumë medalje në Split”, – ka përfunduar presidenti i Federatës Shqiptare të Peshëngritjes, Elez Gjoza, ndonëse Qerimaj nuk ka qenë i bindur edhe sepse ka 20 vjet pa siguracion, me kredi 25 vjet në shtëpinë e tij dhe sipas tij presidenti jeton në luks e vjen në veprimtaritë ndërkombëtare me paratë e trajtimeve ushqimore. Megjithatë tashmë ftesa e Gjozës është dhe duhet pritur se si do të shkojnë gjërat.
